Comhaontú idir an tAontas Eorpach agus an tSile maidir le trádáil i dtáirgí orgánacha

PRÍOMHPHOINTÍ

Comhionannas

• Maidir le táirgeadh orgánach agus a chórais rialaithe ghaolmhara, aithníonn an tAontas Eorpach agus an tSile comhionannas (an cumas na cuspóirí céanna a bhaint amach) dlíthe agus rialacháin a chéile, chomh maith le córais um chigireacht agus um dheimhniúchán.
• Tá na táirgí lena mbaineann liostaithe in iarscríbhinní an chomhaontaithe. Clúdaítear sa chomhaontú táirgí AE amhail:
  • táirgí plandaí neamhphróiseáilte,
  • ainmnithe beo,
  • táirgí ainmhithe neamhphróiseáilte (lena n–áirítear mil),
  • táirgí dobharshaothraithe agus feamainn,
  • táirgí talmhaíochta próiseáilte lena n–úsáid mar bheatha nó mar bhia (lena n–áirítear fíon),
  • ábhar iomadaithe¹ fásúil agus
  • síolta le haghaidh saothraithe.
• Faomhann an Coimisiún Eorpach leasuithe ar bith a dhéantar do liostaí na dtáirgí atá clúdaithe sa chomhaontú thar ceann an Aontais Eorpaigh i ndiaidh dó dul i gcomhairle leis an tSile agus le tíortha AE.

Allmhairiú agus onnmhairiú

Glacann gach páirtí leis na táirgí atá liostaithe sna hiarscríbhinní ón bpáirtí eile faoi na coinníollacha seo a leanas:

• ní mór d’allmhairí isteach san Aontas Eorpach cloí leis na dlíthe agus na rialacháin de chuid na Sile atá liostaithe in Iarscríbhinn IV agus ní mór deimhniú cigireachta bheith leo i gcomhréir le Rialachán (CE) Uimh. 1235/2008, gníomh cur chun feidhme maidir le socruithe le haghaidh allmhairí táirgí orgánacha ó “thríú” tíortha (tíortha nach tíortha den Aontas Eorpach iad);
• ní mór d’allmhairí chuig an tSile cloí leis na dlíthe agus na rialacháin de chuid AE atá liostaithe in Iarscríbhinn III agus ní mór deimhniú bheith leo arna eisiúint ag údarás iomchuí de chuid na Sile nó de chuid AE i gcomhréir leis na rialacha arna leagan amach ag Stiúrthóireacht Náisiúnta na Seirbhíse Talmhaíochta agus Beostoic sa tSile.

Lipéadú

• Ní mór do tháirgí ceanglais dhlíthiúla um lipéadú an pháirtí allmhairíochta a chomhlíonadh agus féadfar lógó orgánach AE nó lógó orgánach na Síle nó an dá cheann a chur orthu. Tá na lógónna orgánacha atá á n–úsáid faoi láthair ag AE agus an tSile dá dtáirgí faoi chosaint chomh maith.
• Aontaíonn na páirtithe nach mbainfidh siad mí–úsáid as téarmaí lipéadaithe lena n–áirítear díorthaigh amhail “bith–” agus “éicea–”.

Faisnéis, tuairisciú agus bainistíocht

• Malartaíonn na páirtithe tuarascáil bhliantúil maidir leis an dóigh a bhfuil an comhaontú á chur i bhfeidhm, lena n–áirítear:
  • faisnéis maidir le cineálacha agus méideanna na dtáirgí orgánacha a onnmhairíodh faoin gcomhaontú;
  • gníomhaíochtaí monatóireachta agus maoirseachta a rinne na húdaráis inniúla, na torthaí a baineadh amach agus na bearta ceartaitheacha a rinneadh.
• Le fógra 3 mhí ar a laghad, déanfaidh oifigigh nó saineolaithe ón bpáirtí eile piarmheasúnuithe lena fhíorú go bhfuil na seiceálacha a cheanglaítear faoin gcomhaontú á gcur i bhfeidhm.
• Tá freagrachtaí ag Comhchoiste ar Tháirgí Orgánacha, a cruthaíodh ó ionadaithe na bpáirtithe (i.e. an tSile agus the tAontas Eorpach), lena n–áirítear na freagrachtaí seo a leanas:
  • an comhaontú a bhainistiú;
  • scrúdú a dhéanamh ar iarratais chun liosta na dtáirgí atá clúdaithe sa chomhaontú a nuashonrú nó a leathnú;
  • comhar maidir le dlíthe, rialacháin, caighdeáin agus nósanna imeachta um measúnú comhréireachta a neartú chun cóineasú a mhéadú;
  • díospóidí a réiteach idir na páirtithe maidir le léirmhíniú nó cur i bhfeidhm an chomhaontaithe.