Judas blir ofte framstilt med ein pung med pengar. Den inneheld 30 sølvmyntar han fekk for å forråde Jesus. Judas har ofte ei gul kappe på seg, ein farge som symboliserer svik og feigskap.
Judas Iskariot er ein av dei tolv disiplane til Jesus i kristendomen. Ifølgje Det nye testamentet forrådde han Jesus. Å forråde er å gå bak ryggen på nokon, svikte dei eller sladre på dei. Judas hjalp romerske soldatar som leitte etter Jesus med å finne han. Han synte soldatane kven i gruppa som var Jesus ved å kysse han. Det førte til at Jesus blei kasta i fengsel og så blei drepen på korset.
Historisk sett er det vanskeleg å vite kven Judas eigentleg var og kva rolle han spelte.
Bøkene i Det nye testamentet omtalar Judas på ulikt vis:
I kristen tradisjon er Judas symbolet på svik og forræderi. I kunsten blir han ofte synt med ein pung med pengar.
Teologar forskar på Bibelen. Dei har tolka rolla til Judas på ulike måtar. Nokon meiner han handla av eigen vilje fordi han var grådig og ville ha pengar. Andre meiner han var ein nødvendig del av planen til Gud. I planen skulle Jesus døy for å ta på seg straffa for alle syndene til menneska, så dei kunne bli frelst. I den siste tolkinga blir Judas eit døme på korleis synd og tilgiving heng saman i kristendommen.
Judas blir brukt som eit skjellsord. Det kan brukast om svik eller om ein forrædar. Ein Judas er ein person som sviktar både andre og det han sjølv trur på.
Ordet «judaspengar» blir brukt om pengar ein får for å forråde andre, eller har tent på uærleg måte.
«Judaskyss» blir brukt om å forråde nokon.
