Banshari Banine

158-રડે આંખો–ગઝલ

રડે આંખો હ્રદય બળતું રહે,

છુપાવી મોં કોઈ મળતું રહે.

બધા ઘૂવડ બની બેઠા છતાં,

અઘોરી મૌન પીગળતું રહે.

અમારી જાતની ભીતર કશું,

યુગોથી રક્ત નિગળતું રહે.

જશે તો ક્યાં જશે એ જળચરો?

મગરને એજ તો ફળતું રહે.

વગર ભીંતે ચણેલી કેદમાં,

અકાળે મોત પણ છળતું રહે.

કરે આ “સાજ” કોને રાવ પણ?

પ્રભુનું શીશ જ્યાં ઢળતું રહે.

   -“સાજ” મેવાડા

Read Full Post »

   157-સમજાવી ગઈ–ગઝલ

મોઘમ હતી એ વાત સમજાવી ગઈ,

મારા હ્રદયનો બાગ મ્હેકાવી ગઈ.

વાદળ હજીએ ચાંદનો પીછો કરે,

તારી રમત આબાદ હંફાવી ગઈ.

ભૂલી ગયો’તો પ્રેમ જેવું કૈંક છે,

તારી ફરીથી યાદ તો આવી ગઈ.

આ મેઘ ગરજે, એક ટહુંકો કોકિલ કરે,

ને કોકિલા પણ ડોક ઝૂકાવી ગઈ.

લો, ‘સાજ’ની સંવેદના વરસી પડી,

તારા વિરહની આગ સળગાવી ગઈ.

 -‘સાજ’ મેવાડા

Read Full Post »

156-PooChhashe Tane-Gazal

       પૂછાશે તને–ગઝલ

ક્યારેક યક્ષ પ્રશ્ન, પૂછાશે તને,

જાણે નહીં તો, ઝેર એ પાશે તને.

શ્રધ્ધા કદી ફળતી નથી એવું નથી,

જા, પૂછ શબરીને, તો સમજાશે તને.

શાને હજી ભટક્યા કરે છે, પામવા?

રસ્તો અલખનો એક દેખાશે તને.

તું જાત તારી ઓળખેના, તો કહું!

આંખો કરીદે બંધ, દેખાશે તને.

છોડી શકે છે? ‘સાજ’ના ભભકા બધા!,

લેછે ફકીરી ભેખ, શું થાશે તને?

-‘સાજ’ મેવાડા

Read Full Post »

155-Malhari Gamak-Gazal-મલ્હારી ગમક

જોઈ એને ઓ હ્રદય તું ના ધબક,

એ જ દેશે ઘાવ છાંટીને નમક.

આંખથી એ મારશે તલવારશીં,

મિત્ર તારો જાણતલ છે, લે સબક.

પંથ કાંટાથી ભરેલો છે વિકટ,

ખૂબ ઊંડે ચૂભશે એની કસક.

બંધ આંખે પ્રેમમાં પડતો નહીં,

આંસુંમાં ડૂબાડશે જલ્દી છટક.

‘સાજ’ની સાથે ગઝલ તું ગા કદી,

વેદનામય છેડ મલ્હારી ગમક.

   ‘સાજ’ મેવાડા

Read Full Post »

154-Kari Laie-કરી લઇએ–ગઝલ

ચાલો હવે ફૂલોથી સંવાદ કરી લઇએ,

કાંટા અને માળીને પણ સાદ કરી લઇએ.

લાચાર બની શામાટે હાર સ્વીકારીલો,

હિંમત કરો તો આજે અપવાદ કરી લઇએ.

દુશ્મન બની આવોના હું દોસ્ત તમારો છું,

આનંદથી આ જીવન આબાદ કરી લઇએ.

આસ્થા નથી રે’તી સર્જનહાર તમારામાં,

ઈશ્વર કને એવી પણ ફરિયાદ કરી લઇએ.

જખ્મો ય ઘણા દેશે, ના હોય દયા જગને,

તો ‘સાજ’ તારા દિલને પોલાદ કરી લઇએ.

 -‘સાજ’ મેવાડા

Read Full Post »