Cur síos:

Glacann Parlaimint na hEorpa an Ionstraim um Sheirbhísí Digiteacha agus an Ionstraim um Margaí Digiteacha, arb é is aidhm dóibh ardáin mhóra teicneolaíochta a rialáil agus spás digiteach níos sábháilte a chruthú.

Leagtar síos leis an Ionstraim um Margaí Digiteacha rialacha soiléire d’ardáin mhóra, arb é is aidhm dóibh stop a chur leo coinníollacha éagóracha a fhorchur ar ghnólachtaí agus ar thomhaltóirí.

Leis an nGníomh um Sheirbhísí Digiteacha, féachtar le húsáideoirí a chosaint ar inneachar díobhálach agus neamhdhleathach agus margaí ar líne agus ardáin thrédhearcacha níos sábháilte a bhunú.

Cur síos:

Faigheann uachtaráin Pharlaimint na hEorpa, na Comhairle agus an Choimisiúin an tuarascáil deiridh ón gComhdháil ar Thodhchaí na hEorpa agus geallann siad go ngníomhóidh siad ar a bhfuil inti.

Ag searmanas in Strasbourg tugtar an doiciméad d’uachtaráin institiúidí an Aontais, doiciméad a bhfuil 49 dtogra ann, agus breis agus 300 beart a glacadh ag seisiún iomlánach na Comhdhála, bunaithe ar smaointe agus moltaí na saoránach.

Sna seachtainí ina dhiaidh sin, iarrann seisiún iomlánach na Parlaiminte go ndéanfaí athbhreithniú ar chonarthaí AE ionas gur féidir le AE gníomhú ar bhealach níos tapa agus níos cinntithí i raon réimsí. Áitíonn na Feisirí ar an gComhairle Eorpach tús a chur le próiseas an athraithe ar na conarthaí.

Cur síos:

Déanann trúpaí Rúiseacha ionsaí ar an Úcráin, tar éis fórsaí míleata a bheith cruinnithe le chéile ar feadh seachtainí agus tar éis do cheannairí domhanda iarrachtaí taidhleoireachta a dhéanamh – in aisce – chun nach mbeadh cogadh san Eoraip arís.

Cáineann Parlaimint na hEorpa an t-ionsaí mar ionsaí gan chúis gan údar. Iarrann na Feisirí go dtabharfaí tacaíocht don Úcráin, lena n-áirítear airm chosanta a chur ar fáil, agus áitíonn siad go gcuirfí diansmachtbhannaí ar an Rúis.

Tá an t-ionradh ina chúis le géarchéim dhaonnúil san Úcráin agus rabharta ollmhór dídeanaithe i dtreo an Aontais.

Cur síos:

Glacann na Feisirí an dlí aeráide Eorpach, a chuireann ceangal ar AE astaíochtaí gás ceaptha teasa a laghdú go leibhéal nialasach faoi 2050.

Leagtar síos leis an dlí sprioc nua atá níos uaillmhianaí chun astaíochtaí a laghdú faoi 2030: laghdú 55 % ar a laghad i gcomparáid le leibhéil 1990 seachas 40 %. Ba cheart don Choimisiún sprioc eatramhach do 2040 a mholadh tráth níos faide anonn.

Cur síos:

Seoltar an Chomhdháil ar Thodhchaí na hEorpa go hoifigiúil le searmanas i bParlaimint na hEorpa in Strasbourg.

Sna míonna amach romhainn, tá an deis ag muintir na hEorpa smaointe a mholadh maidir le gníomhaíocht AE trí ardán ar líne nó trí pháirt a ghlacadh in imeachtaí.

Tagann painéil saoránach Eorpach le chéile in Strasbourg, ar líne agus i gcathracha ar fud AE chun moltaí a ullmhú. Ansin déanann ionadaithe na bpainéal na smaointe a chur i láthair agus a phlé le comhaltaí d’institiúidí an Aontais, le parlaimintí náisiúnta, le húdaráis réigiúnacha agus le heagraíochtaí na sochaí sibhialta. Geallann institiúidí an Aontais go ndéanfaidh siad obair leantach ar na conclúidí ón gComhdháil.

Cur síos:

Toilíonn Parlaimint na hEorpa leis an gcomhaontú lena leagtar síos na rialacha don chaidreamh a bheidh ann amach anseo idir AE agus an Ríocht Aontaithe tar éis tharraingt siar na Ríochta Aontaithe as AE.

Tugadh an Comhaontú Trádála agus Comhair i gcrích i mí na Nollag 2020 agus cuireadh i bhfeidhm go sealadach é amhail ón 1 Eanáir 2021. Tá gá le toiliú na Parlaiminte chun go dtiocfaidh an comhaontú i bhfeidhm.

I rún a ghabhann leis an gcomhaontú, cuireann na Feisirí Eorpacha a n-aiféala in iúl faoi tharraingt siar na Ríochta Aontaithe – ar a dtugann siad “botún stairiúil” – ach fáiltíonn siad roimh an gcomhaontú, toisc go laghdaíonn sé an baol go gcuirfí isteach ar thrádáil agus go gcabhraíonn sé leis an tsíocháin a chaomhnú ar oileán na hÉireann.

Cur síos:

Formheasann Parlaimint na hEorpa reachtaíocht lena mbunaítear sásra lena bhféadfaí íocaíochtaí buiséid le tír AE a sháraíonn an smacht reachta a chur ar fionraí.

Áitíonn na Feisirí go bhfuil gá leis an ngníomh chun leasanna airgeadais agus luachanna bunúsacha AE a chosaint. Tá méadú ar an imní atá ar an bParlaimint go bhfuil an daonlathas agus an smacht reachta faoi ionsaí i roinnt Ballstát.

Cur síos:

Tar éis míonna de chaibidlíocht, tagann Parlaimint na hEorpa agus an Chomhairle ar chomhaontú maidir le buiséad AE 2021-2027, lena gcuirtear EUR 1.8 trilliún de thacaíocht AE ar fáil don téarnamh ó phaindéim COVID-19, mar aon le plean téarnaimh ar leithleach ar a dtugtar “Next Generation EU”.

Faigheann Feisirí Eorpacha méadú ar na cistí do phríomhchláir AE, lena n-áirítear an clár taighde Fís Eorpach, an plean infheistíochta InvestEU, an clár malartaithe Erasmus+ agus an clár nua EU4Health, a bhfuil sé mar aidhm leis an comhordú i gcúram sláinte agus infhaighteacht táirgí agus trealaimh leighis ar fud an Aontais a fheabhsú.

Tagann na Feisirí agus na Ballstáit ar chomhaontú freisin maidir le féilire ceangailteach chun foinsí nua ioncaim AE a thabhairt isteach chun cabhrú leis an bhfiachas a thabhaíonn an tAontas a aisíoc chun an plean téarnaimh Next Generation EU a mhaoiniú.

Cur síos:

Tar éis scaipeadh scanrúil an choróinvíris ar fud an domhain, a cláraíodh den chéad uair in Wuhan, an tSín, dearbhaíonn an Eagraíocht Dhomhanda Sláinte go bhfuil paindéim ann. Tá víreas Covid-19, mar a thugtar air, á scaipeadh san aer, rud a fhágann an-tógálach é. Is cúis le comharthaí cosúil le fliú é.

Tá líon na n-ionfhabhtuithe agus na mbásanna, go háirithe i measc daoine scothaosta, ag ardú go tapa, agus bearta srianta agus srianta taistil á dtabhairt isteach dá bharr sin i dtíortha ar fud an domhain. Titeann gníomhaíocht eacnamaíoch go géar agus is í an obair ón mbaile an gnáthmhodh oibre anois ag go leor daoine.

Athraíonn Parlaimint na hEorpa chuig an gcianobair, ach leanann sí de sheisiúin iomlánacha agus cruinnithe coiste a reáchtáil. Glacann na Feisirí bearta a thugann faoiseamh gearrthéarmach d’earnálacha agus d’oibrithe atá buailte agus iarrann siad arís agus arís eile go mbeadh pacáiste tacaíochta uaillmhianach AE ann chun an bealach a réiteach do théarnamh inbhuanaithe.

Cur síos:

Trí bliana go leith tar éis do thoghthóirí na Ríochta Aontaithe a chinneadh gur mian leo an tAontas Eorpach a fhágáil, daingníodh an comhaontú um tharraingt siar i vóta i bParlaimint na hEorpa an 29 Eanáir 2020.

Ón 1 Feabhra 2020, tá 27 mballstát ann san Aontas Eorpach agus tháinig deireadh le tréimhse oifige fheisirí na Ríochta Aontaithe. Tá Parlaimint na hEorpa comhdhéanta anois de 705 fheisire (i gcomparáid leis an 751 fheisire a bhí ann roimh Brexit). Athdháileadh roinnt de na suíocháin a bhí ag an Ríocht Aontaithe i measc na mballstát a bhí faoi ghannionadaíocht mar gheall ar athruithe déimeagrafacha, rinneadh roinnt eile a choinneáil i gcás mhéadú AE amach anseo.

Cur síos:

Thug feisirí Eorpacha a gceadú leis an gCoimisiún Eorpach nua. Chuir an vóta iomlánach ar fhoireann Ursula von der Leyen deireadh le próiseas faofa na Parlaiminte a bhí sé mar aidhm leis a chinntiú go mbeidh an dlisteanacht dhaonlathach ag feidhmeannas an Aontais Eorpaigh a bheidh ag teastáil chun go mbeidh sé in ann bearta a dhéanamh chun leasa mhuintir uile na hEorpa.

Tá níos mó ban ná riamh sa Choimisiún Eorpach nua agus is í Ursula von der Leyen an chéad bhean a toghadh ina huachtarán ar fheidhmeannas an Aontais. Is iad tosaíochtaí an Choimisiúin nua ná: tacú leis an aistriú i dtreo na haeráidneodrachta, an digitiú, slándáil, agus rannpháirtíocht ghníomhach mhuintir na hEorpa sa díospóireacht faoi thodhchaí na hEorpa.

Cur síos:

Rinne 51% de shaoránaigh AE vóta a chaitheamh sna toghcháin Eorpacha i mí na Bealtaine 2019, an ráta is airde vótála le 20 bliain. Cé gur chaill an páirtí lárnach deasach, Páirtí an Phobail Eorpaigh agus páirtí lárnach na heite clé, na Daonlathaithe Sóisialta suíocháin, tá siad fós ar an dá ghrúpa is mó sa Pharlaimint agus d’éirigh le páirtithe lárnacha agus liobrálacha eile dul chun cinn a dhéanamh.

Cur síos:

26 Márta 2019: Cóipcheart don ré dhigiteach

Glactar le treoir sa Pharlaimint arb é is aidhm di cóipcheart na gcruthaitheoirí ábhair amhail ceoltóirí, taibheoirí agus iriseoirí a chosaint agus cuidiú leo luach saothair níos fearr a bhaint amach mar chúiteamh ar úsáid a saothar ar líne. Is macasamhail iad na rialacha de na socruithe maidir le cóipcheart atá ann i gcoitinne agus ina bhfuil ardáin idirlín faoi dhliteanas i leith an ábhair ar fad a uaslódáiltear ar a suíomhanna gréasáin.

27 Márta 2019: Vótálann an Pharlaimint toirmeasc a chur ar tháirgí plaisteacha aonúsáide

Formheasann feisirí an toirmeasc ó AE ar ítimí plaisteacha aon uaire amhail plátaí, sceanra, soip agus baitíní cadáis ar mar bhruscar trá nó mar mheall plaisteach atá ag méadú de shíor agus ar snámh i bhfarraigí an domhain é a gceann scríbe. Is ionann na táirgí a chumhdaítear faoin dlí agus tuairim is 70% de na hítimí bruscair muirí ina n-iomláine.

Cur síos:

Tugann feisirí a dtoiliú i leith comhaontú comhpháirtíochta eacnamaíche idir AE agus an tSeapáin ina ndéantar ionann is na dleachtanna custaim ar fad atá idir an dá thaobh a bhaint agus ina gcruthaítear crios trádála a chumhdaíonn aon trian d'Olltáirgeacht Intíre an domhain. Deimhníonn an comhaontú arís tiomantas AE do shaorthrádáil a dhéanann poist agus deiseanna a chruthú do ghnólachtaí.

Cur síos:

Tá rialacha nua tagtha i bhfeidhm a chuireann uasteorainn le costais glaonna gutháin a dhéantar agus teachtaireachtaí a sheoltar chuig tíortha eile in AE. Tagann na rialacha i ndiaidh táillí fánaíochta san Eoraip a dhíothú agus tiocfaidh siad i bhfeidhm tar éis do Pharlaimint na hEorpa athruithe a thabhairt isteach ar thograí an Choimisiúin i dtaca le reachtaíocht teileachumarsáide.

Cur síos:

Tagann an Rialachán Ginearálta maidir le Cosaint Sonraí (RGCS) i bhfeidhm, lena n-áirithítear ardchaighdeán cosanta ar shonraí pearsanta daoine ar fud AE. Tá sé mar aidhm leis na rialacha muintir uile na hEorpa a chosaint ar sháruithe príobháideachais agus sonraí, i saol a bhfuil sonraí agus an tionchar atá acu ar an domhan ag méadú, agus creat níos soiléire agus níos comhsheasmhaí a chruthú do ghnólachtaí ag an am céanna.

Cur síos:

In AE, tháinig deireadh le srianta atá bunaithe ar náisiúntacht nó ar áit nasctha a dhéanann siopaí ar líne a fhorchur, tar éis theacht i bhfeidhm dhlí AE a chuireann toirmeasc ar an gcleachtas. Tá sé d’oibleagáid ar mhiondíoltóirí rochtain ar earraí agus ar sheirbhísí a thabhairt do dhaoine ar na téarmaí céanna ar fud AE. Tá sé sin ar cheann de na hiliomad bearta a dhéantar chun margadh aonair digiteach a chruthú ar fud na hEorpa.

Cur síos:

Níl ann do tháillí fánaíochta a ghearrann oibreoirí teileachumarsáide ar thaistealaithe in AE a thuilleadh. Ceadaíonn sé sin do dhaoine atá ar chuairt ghairid i dtír eile in AE tairbhe a bhaint as glaonna fóin póca agus as seirbhísí sonraí ar na praghsanna céanna a íocann siad orthu ina dtír féin.

Ba shaincheist mhór do Pharlaimint na hEorpa deireadh a chur le táillí fánaíochta.

Cur síos:

Osclaíonn an Pharlaimint músaem nua sa Bhruiséil atá tiomnaithe do stair na hEorpa. Is éard is aidhm d’Áras Stair na hEorpa ná machnamh agus díospóireacht a spreagadh maidir leis an Eoraip san am a caitheadh agus mar atá inniu. Chomh maith leis sin, déanann sé leathnú ar thairiscint na Parlaiminte do chuairteoirí, ina gcuimsítear freisin ionad idirghníomhach agus nua-aimseartha na gcuairteoirí, ar a dtugtar an Parlamentarium. Tá leaganacha níos lú den Parlamentarium, a fháiltíonn roimh chuairteoirí in Strasbourg, i mBeirlín agus i Liúibleána.

Cur síos:

Tacaíonn vótálaithe na Ríochta Aontaithe leis an gcinneadh an tAontas Eorpach a fhágáil i reifreann ina raibh coimhlint ghéar agus a ghair David Cameron, Príomh-Aire na Ríochta Aontaithe. Tá toradh an reifrinn ina chionsiocair le Cameron éirí as oifig. Geallann a chomharba, Theresa May, go bhfágfaidh an Ríocht Aontaithe an tAontas Eorpach agus cuireann sí tús leis an bpróiseas an 29 Márta 2017.

Cur síos:

Scaoileann buamálaithe féinmharaithe le pléascthaí ag Aerfort na Bruiséile agus ag stáisiún metro sa Bhruiséil, a mharaíonn 32 dhuine san iomlán.

Glacann an Stát Ioslamach freagracht as an ionsaí. Sna míonna a leanann, glacann an grúpa freagracht as níos mó ionsaithe sceimhlitheoireachta in Nice, i mBeirlín, in Iostanbúl agus in Barcelona. Maraíonn sceimhlitheoirí daoine freisin i Manchain, i Londain, in Saint Petersburg, i Stócólm agus i gcathracha eile san Eoraip.

Mar fhreagairt, chomhaontaigh tíortha AE an tslándáil teorann a neartú, an comhar i measc na seirbhísí faisnéise a fheabhsú agus saothrú ar mhaithe le radacú a chosc.

Cur síos:

Déantar comhaontú domhanda chun astaíochtaí gás ceaptha teasa a laghdú ar bhonn domhanda agus ardú contúirteach i meánteocht an domhain a sheachaint dá bhrí sin, a thabhairt i gcrích i bPáras tar éis blianta a chaitheamh i mbun caibidlíochta.

Glacann Parlaimint na hEorpa páirt sa phróiseas, ós rud e go bhfuil ról tábhachtach aici i ndáil le reachtaíocht AE a ghlacadh ina dhiaidh.

In 2017, fógraíonn Uachtarán na Stát Aontaithe, Donald Trump, go bhfuil na Stáit Aontaithe, an dara astaíre gás ceaptha teasa is mó ar domhan i ndiaidh na Síne, chun tarraingt siar as an gcomhaontú, rud a fhágann go bhfuil sé níos deacra an t-athrú aeráide a mhaolú.

Cur síos:

D’eagraigh sceimhlitheoirí sraith ionsaithe comhordaithe ag suíomhanna éagsúla i bPáras, ag scaoileadh piléar agus ag scaoileadh le pléascthaí trí veisteanna féinmharaithe a mhadhmadh. Maraítear 130 duine ar fad sna hionsaithe, 89 díobh sin ag ceolchoirm in amharclann Bataclan, agus an chuid eile ag bialanna agus ag caiféanna. Glacann an Stáit Ioslamach freagracht as na hionsaithe a rinne saoránaigh de chuid na Fraince agus na Beilge. Fógraíonn údaráis na Fraince staid éigeandála, agus tugtar cumhachtaí leathnaithe do na fórsaí slándála, agus leanfaí de sin go ceann dhá bhliain.

Cur síos:

Tagann ardú leanúnach ar líon na ndaoine a thrasnaíonn an Mheánmhuir ag lorg tearmainn san Eoraip i gcaitheamh 2014 agus 2015, a shroicheann buaicphointe le linn an dara leath de 2015.

Déanann níos mó ná 2.5 milliún duine iarratas ar thearmann in AE in 2015 agus in 2016, - go leor díobh ar a dteitheadh ó chogadh agus ó fhoréigean i dtíortha amhail an tSiria, an Afganastáin agus an Iaráic.

Is imircigh eacnamaíocha iad an chuid eile atá ag lorg bealach éalaithe ón mbochtaineacht. Faigheann an Ghréig agus an Iodáil formhór na n-imirceach agus is é a ndúshlán dul i ngleic leis an insreabhadh, agus tagann díospóidí chun cinn i measc thíortha AE, faoi cé mar is ceart déileáil leis an ngéarchéim.

Is iad príomheilimintí fhreagairt AE a thagann chun cinn ná an córas tearmainn a athchóiriú agus an tslándáil teorann a neartú.