Sámi álbmotbeaivi lea bearjadaga ja gávttit álget leat biggohuvvon ja silbbat šelgejuvvon – dál galgá vel gávdnat báikki, gosa geazada. Dasa gávdnojit doalut miehtá Suoma, ii dušše sámiguovllus.
Dán jagi kulturoaivegávpogis Oulus lea álbmotbeaivve gudnin olles vahku festivála man namma lea Dálvemánnu. Festivála čohkke sámemusihkka, filmmaid ja dáidaga ovtta vahkkui.
Ieš álbmotbeaivve dáhpáhusat álget veaigin kulturvistti Valves, gos beassá gullat Ante Jalvela loaiddasteami. Eahket joatkašuvvá musihkain, go Oulu All Star Big Band ja Ingá-Máret Gaup-Juuso almmustahttet vuosttas oktasaš skearru.
Skearru almmustahttinkonsearta maŋŋá beasságe njuiket áibbas earálágan musihkkamáilbmái Amoc ja Áilu Valle rap-konsearttas.
Oulu kulturoaivegávpot fitnu sámi kultuvrra koordináhtor Aino Valovirta lea oaidnán stuorra beroštumi Oulu dáhpáhusaide ja sajitge leat nohkagoahtán.
– Gal mun rávvešin, ahte gánneha bileahtaid viežžat áiggil juos háliida sisa beassat ja lea nu plánen, muitala Valovirta.
Álbmotbeaivve prográmma ii suige noga vel bearjadateahkedii. Oulus doalut joatkašuvvet lávvardaga Anna Morottaja ja Tallari konsearttain, gos lávddi ala lávke maiddái Suõmmkar.
Sotnabeaivve beassá Oulus oaidnit maiddái Skábmagovain oahpis filmmaid.
Valovirta bovde buohkaid oahpásmuvvat Oulu fálaldahkii.
– Ovllá-ooperas leat čájálmasat gaskavahkus lávvardahkii juohke beaivve ja Eanangiella čájáhus lea maŋŋebárggas cuoŋománu beallemuddui rabas. Daid ávžžuhan mannat geahččat.
Anáris dáhpáhuvvá valjis
Álbmotbeaivvis beassá návddašit maiddái eará sajiin. SámiSoster lágida jo árbevierrun šaddan borademiid Anáris ja Heahtás Luovatupas. Vuohčusge besset čuovvut Anára álbmotbeaivve dáhpáhusaid njuolggosáddaga bokte gáhkkogáfiid olis.
SámiSoster dáhpáhusaide leat buohkat buresboahtán iige ovddalgihtii almmuheapmái leat dárbu.
– Nugo sápmelaččat bohtet guossái ja boradit de dan málle mielde mannat, bovde SámiSoster -searvvi doaimmahatčálli Inger-Anne Äärelä.
Anáris, Sámekulturguovddáš Sajosis, Sámediggi ávvuda seammás Sámi álbmotbeaivvi ja ođđa sámediggelága. Prográmma álgá diibmu 11 áigge ja bistá gitta eahket rádjai. Vuordimis leat panelaságastallamat, sáhkavuorut, musihkka ja gáhkkogáfet. Dilálašvuođa sáhttá čuovvut maiddái njuolggosáddaga bokte.
Bearjadaga eahkedis lea nuoraidsadji Vinttis Aleksi Ahlakorpi stand-up čájáhus.
Lávvardaga ávvudeamit joatkkašuvvet Suõmmšuõn ~ Šuoŋâsuonjâreh ~ Šuokŋasuotnjarat almmustahttinkonsearttain Sajosis.
Ohcejogas doalut juohke gilis
Ohcejoga gielda lágida álbmotbeaidáhpáhusaid juohke gilis. Gáregasnjárgga skuvllas lea iđitbeaivve buohkaide rabas boradeapmi ja ávvudoalut.
Ohcejohnjálmmis lea Ohcejoga gili olbmuide gáhkku ja gáffe ja ávvudoalut leat skuvllas. Dan maŋŋá lea prográmma ahkeolbmuide ja boradeapmi Áilegasdálus.
Njuorggáma skuvllas leat eahkedis ávvudoalut Njuorggán guovllu ahkeolbmuide ja beaiveruovttu mánáide.
Lávvardaga Gáregasnjárggas hotealla Guossis lea Badje-Deanu Sámiid ordnen álbmotbeaivve eahketdoalut, gos beassá gullat Áilu Valle ja DJ Sunnámáret loaiddasteame.
Helssegisge čohkkejit sápmelaččaid ávvudit
Sámeguovllu olggobealdege ii dárbbaš duhtat dušše gáiddusin dáhpáhusaid čuovvumii. Mátta-Suoma sámesearvi lea áibbas ođđa searvi ja ordne vuosttas stuorát dáhpáhussan álbmotbeaidoaluid. Doalut leat Helssegis Semifinalis ja doppe beassá gullat moadde sáhkavuoru ja musihkkaloaiddastemiid Yungmiqus ja DJ Hulluellas.
Mátta-Suoma Sámesearvvi ságadoalli Janne Hirvasvuopio háliida doaluiguin ávvudit sámediggelága, muhto maiddái váldit dan áiggi dušše leahkit ovttas.
– Gánske dán álbmotbeaivve ii dárbbaš smiehttat, ahte mii čuovvovažžan dáhpáhuvvá, sáhttá eallit dán áiggis. Misge lea vuoigatvuohta dušše suohtastallat dađi stuorát agenda haga, lohká Hirvasvuopio.
Beaivit beassá Helssegis gávpotmuseas gullat Petteri Morottaja árbevirolaš livđe, masa buktá urbána duogáža Tero Dubrovin. Dilálašvuohta lea nuvttá.
Eahketbeallai beassá Espoos nuvttá dilálašvuođas gullat maiddái Niillas Holmberg ja saksofonista Pauli Lyytisa oktasaš ovdanbuktima.
Espoos beassá návddašit sámemusihkka máŋggage sajis. Sellosáles beassá gullat čieža Ánnámáret Bálvvosbáiki konsearta.
Maiddái Tamperes ja Jyväskyläs ávvudit álbmotbeaivvi, go Sámesearvi Bárbmu ordne smávva deaivvademiid.
NRK lea čohkken ovtta artihkkalii Sámi álbmotbeaidáhpáhusaid Norggas.
Ođas beaividuvvon 5.2. dii 13.28: Lasihuvvon diehtu Niillas Holmberg ja Pauli Lyytisa konseartas.
Ođas beaividuvvon 6.2. dii 9.21: Lasihuvvon diehtu Ánnámáret konseartas.
