Suomas lea álgojagis boahtán fápmui ođasmahttojuvvon vearjorihkkusláhka. Lága mielde sáhttá oažžut juobe jagi guhkkosaš faŋgalduomu, jus lea niibi mielde almmolaš báikkis dohkálaš siva haga.
Ovdal sáhtii ráŋggáštuvvot sáhkuin jus lei mielde niibi dahje eará dávvir, mainna sáhttá vahágahttit nuppi olbmo.
Boles áiguge boahttevuođas gohcit ja čuovvut dárkilabbot almmolaš báikkiin.
Sámis niibi lea árgabeaivválaš diŋga
Sámeguovllus lea dábálaš, ahte ovdamearkka dihte meahcásteddjiin ja badjeolbmuin sáhttá leat niibeboagán go bisánastet márkanis.
Gáregasnjárgalaš gávpejas Hans-Niiles Tapiola lea hárjánan oaidnit kundariid, geain lea sámeniibi boahkánis. Su gávppis goit niibbit eai leat dagahan dorvvuhisvuođa dovddu.
– Jáhkán, goitge ahte dan ođđa láhkii lea dárbu, ii dáppe muhto eará báikkiin.
Kafea eaiggát Otto Paltto, Lásse Juhán Otto vásáhusa mielde goit eanaš oassi turisttain, geat fitnet kafeas, guđđet niibbi biilii. Son lea liikká maid hárjánan oaidnit niibbiid márkanis. Su mielas lea iešalddes buorre, ahte guođđit niibbi eret go johtit čoahkkebáikkiin.
– In mun gal doala oppa dárbunge dáppe niibbiiguin johtit gávppiid šiljuin ja gosa beare mannáge. Dieđusge go lea bargohommáin, dalle lea eará ášši.
Kárášjohkalaš Thoralf Balto johtá ollu ealgabivddus ja guolásteamen. Son gal nuollala niibeboahkána eret jus gártá finadit gávppis.
Son ii leat oaidnán, ahte giige livččii ballan, jus geas nu lea niibi mielde gávppis finadettiin.
– Go ieš leamašan ealgabivddus ja finan márkanis ja buvddas, de gálgalan eret niibeboahkána dan sivas go mun láven smiehtat jus šaddá mihkkige, amas mu energiija diesa gollat.
