Oulu universitehta Giellagas-instituhtta deavdá dán jagi 25 jagi. Dan ávvun ordnejitge Oulus máŋggaid dáhpáhusaid.
Giellagas-instituhta hoavda Sigga-Marja Magga muitala, ahte sii háliidedje doallat olles jagi logaldallanráiddu ovtta stuorra dáhpáhusa sajis.
– Juos lea beare okta feasta de eai beasa buot olbmot čuovvut, muitala Magga.
Logaldallamat ja dáhpáhusat leat boahtimin sámegielaide sihke suomagillii ja eaŋgalasgillii, nappo buohkaide gávdno juoidá. Buot jagi dáhpáhusat leat dohkkehuvvon maiddái oassin Oulu2026 -kulturprográmmas.
– Kulturoaivegávpot Oulu lea mielde min jagis ja veahkehit min, dathan lea hui buorre ášši, illuda Magga.
Ávvujahki álgá guovvamánu 11. beaivve vuosttas seminárain. Semináras beassá gullat earret eará Giellagas-instituhta ásaheaddjiid Anni-Siiri Länsman ja Veli-Pekka Lehtola muitaleamen Giellagas-instituhta vuođđudeamis ja álggaheamis.
– Beassat dasto seammás veháš hábmet, mo dás ovddosguvlui, árvala Magga.
Stuorra váikkuhus sámi servvodahkii
Giellagas-instituhtta ásahuvvui jagis 2001 ulbmilin dutkat ja oahpahit sápmelaččaid gielaid, historjjá, servvodaga ja kultur-fenomenaid.
Magga lea oaidnán man stuorra váikkuhus instituhtas leamašan sámeservošii. 25 jagi áigge leat ožžon olu ođđa oahpaheaddjiid, kulturdoaibmiid ja áššedovdiid sámi servvodahkii.
– Miihan leat hui aktiivvat maiddái sámi kultureallimis. Daninge dat lea hui mearkkašahtti, árvala Magga.
Giellagas-instituhta boahttevuođa lea Magga mielas dán muttus veháš váttis einnostit, go máilmmis sáhttet áššit ovdánit jođánitge.
– Ii leat eará go čuovvut mii dáhpáhuvvá máilmmis viidásabbot ja sámi servvodagas ja geahččalit buoremus lágiin bissut fárus.
