Suomâ staatâ iävtut lasebudjetist 300 000 eurod sämmilâš psykososiaallâš ohtâdâhân Uvjân ihán 2026. Meriruttâ tuurvâst ohtâduv tooimâ taan ive loopân.
– Lam kal lamaš optimistlâš ubâ ääigi, et taat toimâ juátkoo. Taat lâi tuođâi šiev uuđâs, et meriruttâ mijjân iävtuttuvvoo já mij pastep toimâđ ive loopân, Uvjâ hahâjođetteijee Heidi Eriksen muštâl.
Siärvádâh lii adelâm vijđáht torjuu
Eriksen muštâl, et sun lii huámášâm, mon stuorrâ torjuu ohtâdâh lii finnim puoh ovdâskoddepiäláduvâin já meid sämisiärvusist.
– Tien tááhust uáinám kal šiev puátteevuođâ Uvjân. Lii tehálâš, et sämiaalmug lii lekkâsâm savâstâllâđ tai majemui ivij ääigi tagarijn rašes aašijn já pyehtip tuárjuđ sii tast, Eriksen illood.
Sehe Sämitigge já sämmilij tuotâvuotâ- já sovâdâttâmkomissio láá tiäduttâm, ete tooimâ jootkân tarbâšuvvoo pisovâš já kuhesáigásâš ruttâdem.
– Taan ääši oovdân porgâp ubâ ääigi. Lam uáli vises tast, et meid puáttee ive mij ruttâdem visásmuvá. Mii ulmen lii porgâđ täst taggaar pisovâš toimâ, Eriksen pahudij.
Puáttee ihán Eriksen arvâl, et Uvjân puátá val merikoskâsâš ruttâdem. Ohtâdâh parga ton oovdân, ete toimâ liččii fáárust meid puáttee haldâttâsohjelmijn.
Uáiviminister kijttij pargo
Moonnâm ive loopâst uáiviminister Petteri Orpo kijtij sämmilâš psykososiaallâš ohtâduv Uvjâ šiev palvâlem tuotâvuotâ- já sovâdâttâmkomissio raapoort keigimtilálâšvuođâst.
– Muu mielâst kolgâp anneeđ huolâ, et taat pargo ruttâduvvoo meid puátteevuođâst, muštâlij Orpo tieđettemtilálâšvuođâst juovlâmáánu aalgâst.
Tiivvum 12.2.2026 tme 13.43: Paječaalâ tiivvum, et Uvjâ lii finniimin jotkâruttâdem, ko ovdil luuvâi, et Uvjâ finnij jotkâruttâdem.
