L-ekwità soċjali Ewropea

Ħarsa ġenerali

Il-mudell soċjali uniku tal-Ewropa huwa bbażat fuq il-ħolqien tal-prosperità filwaqt li jiżgura li ħadd ma jintesa. Ksibna ħafna, iżda għad baqa’ xi jsir. Il-kriżijiet ta’ dawn l-aħħar snin ħallew impatt fuq l-istandards tal-għajxien ta’ ħafna Ewropej. In-nuqqas ta’ akkomodazzjoni affordabbli u ta’ aċċess għas-servizzi essenzjali, il-faqar u l-inugwaljanzi tal-opportunitajiet jaf idgħajfu l-għaqda ta’ bejnietna.

Is-soċjetajiet u l-ekonomiji tagħna se jkomplu jevolvu. Dan ifisser li jeħtieġ niffukaw l-isforzi tagħna fuq is-sostenn u t-titjib tal-kwalità tal-ħajja li ngawdu llum. Matul il-5 snin li ġejjin, il-Kummissjoni Ewropea se taħdem biex tippromwovi l-ekwità soċjali, issaħħaħ il-koeżjoni soċjali u reġjonali, u tiżgura opportunitajiet indaqs għal kulħadd.

X’jaħsbu l-Ewropej?

88 %

taċ-ċittadini jqisu li Ewropa soċjali hija importanti għalihom

54 %

jemmnu li sal-2030 se jkollna Ewropa aktar soċjali

L-istandard tal-għajxien

jitiqies bħala l-aktar prijorità soċjali importanti għall-UE

Objettivi

Nipprovdu opportunitajiet, stabbiltà u benesseri għal kulħadd
Insaħħu l-mudell tas-suq soċjali tagħna
biex niżguraw tranżizzjoni ġusta għal kulħadd
Nindirizzaw l-inugwaljanza, id-disparitajiet reġjonali u d-diskriminazzjoni

Kif se nilħqu l-objettivi tagħna

Matul il-ftit snin li ġejjin, se naħdmu fuq dan billi

Nippromwovu l-ekwità soċjali fl-ekonomija moderna

Sabiex niżguraw l-ekwità soċjali,

se nistabbilixxu pjan ta’ azzjoni ġdid dwar l-implimentazzjoni tal-Pilastru Ewropew tad-Drittijiet Soċjali ħalli nilħqu l-miri soċjali ewlenin tagħna għall-2030
se nappoġġaw il-pagi ġusti, il-kundizzjonijiet tax-xogħol tajbin, it-taħriġ u t-tranżizzjonijiet ġusti minn impjieg għal ieħor permezz ta’ Pjan Direzzjonali ġdid għal Impjiegi ta’ Kwalità
se nsaħħu d-djalogu soċjali Ewropew permezz ta’ Patt ġdid għad-Djalogu Soċjali Ewropew
se nindirizzaw il-kawżi ewlenin tal-faqar permezz tal-ewwel Strateġija tal-UE Kontra l-Faqar
se nevitaw u nikkumbattu l-esklużjoni soċjali tat-tfal permezz tal-edukazzjoni, il-kura tas-saħħa u s-servizzi pubbliċi essenzjali billi nsaħħu l-Garanzija għat-Tfal
se nindirizzaw il-kriżi tal-akkomodazzjoni billi nressqu l-ewwel Pjan Ewropew għal Akkomodazzjoni Affordabbli u noħolqu pjattaforma ta’ investiment pan-Ewropea għal akkomodazzjoni affordabbli u sostenibbli
se nintroduċu l-Fond Soċjali għall-Klima biex nappoġġaw ir-rinnovazzjonijiet u l-akkomodazzjoni effiċjenti fl-użu tal-enerġija
se nindirizzaw il-kawżi ewlenin tat-tibdil demografiku
se nnaqqsu d-disparitajiet reġjonali ħalli l-Ewropej ikunu jistgħu jgħixu u jaħdmu f’post li għalihom huwa darhom

Nerġgħu ngħaqqdu s-soċjetajiet tagħna u nappoġġaw liż-żgħażagħ

Sabiex inżidu s-solidarjetà fost iċ-ċittadini,

se naħdmu biex nissalvagwardjaw id-drittijiet tal-minoranzi
se nsaħħu l-Erasmus+ biex aktar Ewropej ikunu jistgħu jiksbu ħiliet ġodda u jiżviluppaw fehim reċiproku aħjar
se norganizzaw Djalogi ta’ Politika maż-Żgħażagħ annwali biex niżguraw li ż-żgħażagħ ikunu jistgħu jaqsmu l-opinjonijiet tagħhom biex isawru l-futur tal-UE
se nistabbilixxu Bord Konsultattiv taż-Żgħażagħ magħmul minn żgħażagħ mill-Istati Membri kollha biex jinforma lill-President tal-Kummissjoni dwar il-problemi li jħabbtu wiċċhom magħhom iż-żgħażagħ
se nwettqu inkjesta fl-UE kollha dwar l-impatti usa’ tal-media soċjali fuq il-benesseri tan-nies
se nindirizzaw is-servizzi online li huma mfassla biex joħolqu dipendenza
se noħolqu pjan ta’ azzjoni kontra l-bullying ċibernetiku
se nagħmluha aktar faċli li n-nies jibbenefikaw mill-wirt kulturali rikk u divers tal-Ewropa

Nibnu Unjoni tal-ugwaljanza vera

Sabiex noħolqu ugwaljanza vera

se naġġornaw l-istrateġija għall-ugwaljanza tal-LGBTIQ u niżviluppaw strateġija ġdida kontra r-razziżmu, ħalli kulħadd ikun jista’ jirnexxi u jmexxi, ikun min ikun
se niżviluppaw pjan direzzjonali għad-drittijiet tan-nisa u strateġija ġdida għall-ugwaljanza bejn il-ġeneri

Il-progress s’issa

Segwi l-progress ta’ inizjattivi ġodda, liġijiet proposti u bidliet leġiżlattivi skont din il-prijorità, u żomm ruħek aġġornat dwarhom

Jannar 2024
Is-Summit tas-Sħab Soċjali ta’ Val Duchesse
Il-Kummissjoni u s-sħab tagħha jimpenjaw ruħhom li jsaħħu d-djalogu soċjali biex jindirizzaw l-isfidi ekonomiċi u dawk marbuta max-xogħol.
Novembru 2023
Il-Kummissjoni tistabbilixxi network tal-UE dwar il-prevenzjoni tal-vjolenza abbażi tal-ġeneru u tal-vjolenza domestika

Fiċ-ċentru tal-attenzjoni

Qed jirnexxilna nxejnu d-diskriminazzjoni fl-UE?

Fl-UE, id-diskriminazzjoni abbażi ta’ kwalunkwe raġuni hija pprojbita bil-liġi. Iżda għal ħafna nies, din għadha realtà ta’ kuljum. Sabiex tindirizza din il-problema, il-Kummissjoni ilha mill-2020 tressaq inizjattivi ġodda kontra r-razziżmu u l-antisemitiżmu, kif ukoll favur il-persuni LGBTIQ u l-komunitajiet Rom. Dan l-aħħar ġew ippubblikati rapporti ta’ progress dwar l-erbgħa li huma.

Aqra aktar