Rialacha Nós Imeachta an Choimisiúin Eorpaigh

Struchtúr

• Coláisteacht – ní mór don Choimisiún gníomhú mar choláiste, le hUachtarán agus Coimisinéirí eile, lena n-áirítear Ardionadaí an Aontais Eorpaigh do Ghnóthaí Eachtracha agus don Bheartas Slándála, agus róil shainithe ag gach ceann acu.
• Tosaíochtaí, clár oibre agus buiséad – ní mór don Choimisiún tosaíochtaí a shocrú i gcomhréir leis na treoirlínte polaitiúla a leagann an tUachtarán síos, rud a léirítear ina chlár oibre agus i ndréachtbhuiséad ginearálta an Aontais Eorpaigh, a ghlacann sé gach bliain.

Nósanna imeachta cinnteoireachta

• Nós imeachta ó bhéal. Glacann an Coimisiún cinntí – cinntí a bhfuil tábhacht mhór pholaitiúil nó eacnamaíoch ag baint leo den chuid is mó – le linn a chruinnithe gnáth nó urghnácha.
• Nós imeachta i scríbhinn. Glactar cinntí i scríbhinn laistigh de theorainn ama réamhshocraithe.
• Nós imeachta cumhachtaithe. Tugann an Coimisiún cumhacht do Choimisinéir amháin nó níos mó bearta bainistíochta nó riaracháin a ghlacadh thar a cheann.
• Nós imeachta tarmligin. Tarmligeann an Coimisiún an chumhacht chun bearta bainistíochta nó riaracháin áirithe a ghlacadh thar a cheann chuig Stiúrthóirí Ginearálta nó Ceannairí Seirbhíse.

Seirbhísí agus comhoibriú idirsheirbhíse

• Tá struchtúr na heagraíochta comhdhéanta de roinnt Ard-Stiúrthóireachtaí (ASanna) agus seirbhísí eile de chuid an Choimisiúin. Is seirbhís riaracháin aonair iad seo agus roinneann siad freagracht chomhchoiteann as comhtháthú na mbeartas uile.
• Cloíonn an fhoireann leis na rialacha gairmiúla agus eiticiúla is airde agus gníomhaíonn sí i gcomhréir leis na Rialacháin Foirne agus leis an gCód Dea-Iompraíochta Riaracháin.
• Ról an Ard-Rúnaí – cuidíonn sé leis an Uachtarán, lena n-áirítear trína chinntiú go bhfuil tosaíochtaí an Choimisiúin ailínithe leis na treoirlínte polaitiúla.
• Ról na nArd-Stiúrthóirí, na gCeann Seirbhíse agus na Seirbhíse Dlí.
• I bhfianaise phrionsabal na comhghleacaíochta, déantar comhairliúcháin idir ASanna agus an Ard-Rúnaíocht, an tSeirbhís Dlí agus seirbhísí eile le linn ullmhú dréacht-achta.

Trédhearcacht, cosaint sonraí agus slándáil

• Infhaighteacht phoiblí tograí reachtachaagus doiciméad gaolmhar.
• Trédhearcacht caidrimh le hionadaithe leasmhara i gcomhréir le rialacha agus prionsabail an chláir trédhearcachta poiblí.
• Rialacha mionsonraithe maidir le cur i bhfeidhm Rialachán (CE) Uimh. 1049/2001 maidir le rochtain phoiblí ar dhoiciméid (Iarscríbhinn).
• Oibleagáid ghinearálta chun rúndacht plé, faisnéise agus doiciméad a urramú.

Fanann na hiarscríbhinní seo a leanas a ghabhann leis na Rialacha Nós Imeachta i bhfeidhm go sealadach:

• an t-iarscríbhinn lena mbunaítear an córas foláirimh thapa ghinearálta ARGUS; agus
• an t-iarscríbhinn maidir le cur i bhfeidhm fhorálacha Choinbhinsiún Aarhus maidir le rochtain ar fhaisnéis, rannpháirtíocht phoiblí i gcinnteoireacht agus rochtain ar cheartas i gcúrsaí comhshaoil ar institiúidí agus comhlachtaí pobail.