L-Uffiċċju tal-Pubblikazzjonijiet

PUNTI EWLENIN

Rwol

L-Uffiċċju tal-Pubblikazzjonijiet (OP) huwa uffiċċju interistituzzjonali bil-kompitu li jippubblika l-pubblikazzjonijiet tal-istituzzjonijiet tal-UE. Huwa responsabbli għall-ħruġ ta’ pubblikazzjonijiet legali u ġenerali kemm fuq karta kif ukoll f’format elettroniku, bħal:

• Il-Ġurnal Uffiċjali tal-Unjoni Ewropea, li joħroġ kuljum bi 23 lingwa (24 meta jkun meħtieġ l-Irlandiż);
• firxa ta’ siti web għaċ-ċittadini tal-UE, il-gvernijiet u n-negozji, fosthom:
  • EUR-Lex,
  • Portal tad-Dejta Miftuħa tal-UE,
  • EU Bookshop,
  • Tenders Electronic Daily (TED),
  • Servizz Komunitarju ta’ Informazzjoni dwar ir-Riċerka u l-Iżvilupp.

L-OP jiżgura wkoll il-preservazzjoni fit-tul tal-kontenut prodott mill-istituzzjonijiet u l-korpi tal-UE.

Barra minn hekk, l-OP jipprovdi pariri u assistenza lill-istituzzjonijiet tal-UE f’għadd ta’ oqsma, fosthom:

• il-programmazzjoni u l-ippjanar tal-programmi tagħhom ta’ pubblikazzjoni;
• l-għoti ta’ informazzjoni dwar ix-xejriet tas-suq tal-pubblikazzjonijiet fil-pajjiżi tal-UE u dwar is-suġġetti li x’aktarx ikollhom l-ikbar udjenza;
• il-provvediment ta’ superviżjoni teknoloġika tas-sistemi ta’ pubblikazzjoni.

Kompiti

L-OP għandu għadd ta’ kompiti speċifiċi, fosthom:

• il-kollazzjoni ta’ dokumenti għal pubblikazzjoni;
• il-forniment tat-tħejjija, id-disinn grafiku, il-korrezzjoni, l-arranġament tal-paġni u l-verifika tat-testi li sejrin jiġu ppubblikati;
• l-indiċjar u l-ikkatalogar tal-pubblikazzjonijiet;
• l-analiżi dokumentarja tat-testi ppubblikati fil-Ġurnal Uffiċjali u ta’ testi uffiċjali oħra;
• il-konsolidazzjoni tal-leġiżlazzjoni;
• il-ġestjoni, l-iżvilupp, l-aġġornament u d-distribuzzjoni tat-teżawru multilingwi Eurovoc;
• l-organizzazzjoni tal-istampar tal-pubblikazzjonijiet mill-fornituri ta’ servizzi tal-Uffiċċju;
• il-kontroll tal-kwalità tal-fatturi involuti fil-produzzjoni;
• id-distribuzzjoni tal-Ġurnal Uffiċjali, tat-testi uffiċjali minbarra dawk ippubblikati fl-Ġurnal Uffiċjali u ta’ pubblikazzjonijiet oħra mhux obbligatorji (permezz tas-siti EUR-Lex u Pubblikazzjonijiet tal-UE jew stampati fuq karta);
• l-arkivjar fiżiku u elettroniku;
• il-ħolqien, ix-xiri, il-ġestjoni, l-aġġornament, il-monitoraġġ u s-superviżjoni tal-listi tal-indirizzi tal-istituzzjonijiet u l-ħolqien ta’ listi ta’ indirizzi mmirati.

Ir-responsabilitajiet tal-istituzzjonijiet

• Kull waħda mill-istituzzjonijiet għandha tuża s-servizzi tal-OP għall-pubblikazzjoni tal-pubblikazzjonijiet obbligatorji tagħha.
• Fejn jidħlu l-pubblikazzjonijiet mhux obbligatorji, l-istituzzjonijiet tal-UE jiddeċiedu jekk iridux jagħmlu użu mis-servizzi tal-OP jew le.
• Fil-każijiet fejn l-istituzzjonijiet tal-UE joħorġu pubblikazzjonijiet mingħajr l-involviment tal-OP, għandhom madankollu jitolbu lill-Uffiċċju għal identifikaturi (klassifikazzjoni tal-pubblikazzjonijiet b’mod inekwivoku u esklussiv) u jipprovdulu kopji tal-pubblikazzjonijiet.