Evrópsk stafræn skilríki vegna náms

Evrópsk stafræn skilríki vegna náms (European Digital Credential for Learning, EDC-skilríki) er sannprófanleg, stafræn útgáfa af skilríkjum sem stofnun gefur út til námsmanns til að skjalfesta nám hans. Þar á meðal eru prófskírteini, þjálfunarvottorð, örnámsskilríki, þátttökuvottorð og fleira. Hægt er gefa þau út á öllum tungumálum ESB og Europass og þau eru undirrituð með rafrænu innsigli (tegund stafrænnar undirskriftar sem tilheyrir viðurkenndri stofnun eða samtökum).

Þar sem þau eru stafræn getur þú fljótt og auðveldlega deilt skilríkjum með væntanlegum vinnuveitendum, notað þau til að sækja um frekari þjálfun, eða lagt þau fram í tengslum við viðurkenningarferli, án þess að þurfa að skanna eða afrita pappírsskírteinið þitt. EDC-skilríki fela í sér röð sannprófunarathugana sem gerir öllum kleift að skoða skilríkin til að sannreyna uppruna þeirra og staðfesta gildi og ósvikni þeirra.

Ef stofnun gefur út EDC-skilríki til þín færðu þau annað hvort afhent beint í Europass-veskið þitt (aðgengilegt í Europass-skjalasafninu þínu) eða með tölvupósti, sem gerir þér kleift að hala upp skilríkjunum í Europass-veskið þitt (eða önnur veski sem uppfylla kröfur).

Europass-veskið þitt er svæði í Europass-reikningnum þínum þar sem þú getur á öruggan hátt geymt EDC-skilríkin þín og þar sem þú getur auðveldlega deilt skilríkjum þínum beint og látið þau fylgja umsóknum þínum ásamt ferilskrá þinni, fylgibréfi og öðrum viðeigandi skjölum.

Vinsamlegast athugið að það er mikilvægt að annað hvort:

Geyma skilríkin þín í Europass-veski eða öðru veski sem uppfyllir kröfur
Eða hala skilríkjum þínum reglulega upp í EDC Viewer

Það er til að tryggja að EDC-skilríkin þín haldist í gildi með tímanum. Frekari upplýsingar er að finna í kaflanum „Mikilvægar upplýsingar um að geyma EDC-skilríkin þín“.

Hvernig nota ég evrópsk stafræn skilríki vegna náms?

Með Europass getur þú: geymt, skoðað, farið í gegnum og deilt EDC-skilríkjum þínum.

Að geyma EDC-skilríkin mín

Þegar stofnun gefur út EDC-skilríki til þín færðu tilkynningu á netfangið sem þú gafst stofnuninni upp. Í þeim tölvupósti færðu annað hvort beinan tengil á veskið þitt þar sem þú getur fundið og skoðað EDC-skilríkin þín, eða þú finnur skilríkin þín í viðhengi með meðfylgjandi leiðbeiningum um hvernig á að sjá innihald þeirra.

Ef skilríkin þín hafa verið sett beint inn á Europass-veskið þitt þarftu ekki að gera neitt frekar. Þú getur fengið aðgang að skilríkjunum þínum með því að smella á tengilinn í tölvupóstinum eða með því að skrá þig inn á Europass-reikninginn þinn og opna hlutann „Vottorð og prófskírteini“ í Europass-skjalasafninu þínu.

Ef þú ert ekki með Europass-reikning skráðan á netfangið þangað sem þú fékkst EDC-skilríkin send er einnig hugsanlegt að þú fáir tölvupóst þar sem fram kemur að tímabundið Europass-veski hafi verið búið til fyrir þig. Til að sækja þetta tímabundna veski þarftu að búa til Europass-reikning með sama netfangi og EDC-skilríkin þín voru send á. Þegar þú hefur búið til reikning geturðu fundið skilríkin þín í hlutanum „Skjalasafnið mitt“. Ef þú velur að sækja ekki veskið verður því eytt sjálfkrafa eftir 6 mánuði.

Ef þú hefur fengið skilríkin í viðhengi og vilt geyma þau á öruggan hátt í stafrænu veski (og þú ert ekki enn með Europass-reikning) þarftu fyrst að búa til Europass-reikning.

Síðan skaltu fylgja skrefunum hér að neðan:

Farðu í Europass-skjalasafnið þitt
Skrunaðu niður í hlutann „Vottorð og prófskírteini“. Þetta er líka Europass-veskið þitt.
Smelltu á „bæta við“ hnappinn efst í hægra horninu á hlutanum.
Veldu og upphalaðu skilríkjaskránni sem þú fékkst á netfangið þitt.

Skilríkin þín eru nú geymd í Europass-veskinu þínu. Þú getur líka valið að geyma EDC-skilríkin þín án nettengingar.

Mikilvægar upplýsingar um geymslu EDC-skilríkja þinna

Vinsamlegast hafðu í huga að EDC-skilríkin þín eru undirrituð með rafrænu innsigli sem hefur tiltekinn gildistíma. Ef þú geymir skilríkin þín í Europass-veskinu þínu, þá framlengist gildistími þeirra sjálfkrafa. Hins vegar, ef þú velur að geyma þau án nettengingar ættir þú öðru hvoru að hala þeim upp í EDC Viewer til að tryggja að undirskriftargildi skilríkja þinna framlengist áður en þau renna út. Þess vegna mælum við með því að geyma EDC-skilríkin þín í Europass-veski. Þegar þú halar upp skilríkjum í Viewer þegar skammt er til þar gildistími þeirra rennur úr muntu sjá sprettiglugga sem tilkynnir þér að skilríkin þín muni brátt falla úr gildi. Til að halda áfram að skoða skilríkin þín þarftu að framlengja gildistíma þeirra með því að smella á „já“. Þá verður ný útgáfa af skilríkjunum þínum sjálfkrafa búin til með framlengdum gildistíma. Þú þarft hins vegar að hala niður og vista þessa nýju útgáfu af skilríkjunum til að tryggja að þú getir fengið aðgang að skilríkjum þinum í framtíðinni.

Að skoða EDC-skilríkin mín

Þú getur annað hvort valið að opna EDC-skilríkin þín úr Europass-veskinu þínu með því að smella á smámynd þeirra, en þá verður þér vísað til EDC Viewer, eða þú getur valið að hala upp upprunalegu skilríkjaskránni (móttekin í tölvupósti eða geymd án nettengingar) beint í EDC Viewer. Í EDC Viewer þarftu bara að smella á gula hnappinn „hala upp skilríkjum“ og velja skilríkjaskrána sem þú halaðir niður úr upprunalega tilkynningartölvupóstinum þínum.

Vinsamlegast athugið að þessi skilríki eru aðeins tölvulæsileg og hafa skráarnafnaukann.jsonld. Þú munt ekki geta opnað þau í neinu öðru forriti en Europass-veskinu og Viewer eða samhæfðum valkosti sem stofnunin þín tilgreinir.

Að fara í gegnum EDC-skilríkin mín

Evrópsk stafræn skilríki vegna náms samanstanda af þremur mismunandi lögum:

Samantektarmyndin: þetta er dæmigerð mynd af skilríkjunum þínum sem inniheldur venjulega lágmarksupplýsingar um skilríkin þín: nafnið þitt, titill skilríkjanna og allar aðrar upplýsingar sem útgefandi skilríkjanna kaus að hafa með.
Sannvottunar- og sannprófunarathuganir: þessar athuganir veita þér upplýsingar um gildi og áreiðanleika tæknilegs sniðs skilríkjanna þinna og ósvikni þeirra. Þær veita þér líka upplýsingar um:
a.    Hver innsiglaði skilríkin (þ.e. lögaðilinn sem gaf þau út til þín)
b.    Ef þau hafa gilda viðurkenningu sem tengist þeim (viðurkenning er viðbótarform gæðaeftirlits sem stofnanir á sviði formlegs náms geta vísað til ef þær óska þess. Hins vegar eru skilríki eftir sem áður gild án viðurkenningar).
c.    Ef einhver hefur átt við skilríkin, þ.e. breytt innihaldi skráarinnar. Í þessu tilfelli myndi innsiglið brotna og þessar sannprófunarathuganir myndu mistakast, þannig að hver sá sem skoðaði skilríkin þín myndi átta sig á því að ekki er lengur hægt að treysta innihaldi skilríkjanna.
Innihaldið: skipulagt innihald skilríkjanna birtist í hlutum sem sýna upplýsingar um handhafa og útgefanda skilríkjanna ásamt gögnum um árangur, nám, mat eða réttindi sem þú hefur fengið skilríki fyrir.

Á vinstri hlið EDC Viewer finnur þú smellanlega flipa sem hægt er að nota til að fá aðgang að og fara á milli þessara upplýsingahluta. Þar er hægt að skoða allt innihald skilríkjanna, því til viðbótar við persónuupplýsingar þínar (að lágmarki nafn þitt) kann það að innifela lýsingar á námskeiðinu sem þú laukst, einkunnum þínum, námsárangri þínum eða aðrar upplýsingar sem útgáfustofnunin skráði í skilríkin þín. Þessar viðbótarupplýsingar gera þér kleift að sýna væntanlegum vinnuveitendum eða öðrum utanaðkomandi aðilum upplýsingar um nám þitt, og þeir geta síðan staðfest þekkingu þína og færni.

Að deila EDC-skilríkjunum mínum

EDC-skilríki eru hönnuð til að auðvelda miðlun til væntanlegra vinnuveitenda, menntunar- og þjálfunaraðila þegar sótt er um nám, eða til annarra aðila, t.d. í viðurkenningarskyni. Þú ættir aldrei að deila upprunalegu skilríkjaskránni (það er skráin sem þú fékkst í tölvupósti eða sem þú halaðir niður úr veskinu þínu, á JSON-LD sniði). Það er upprunalega útgáfan af skilríkjunum þínum og hún ætti aðeins að vera aðgengileg þér. Til að deila skilríkjunum þínum getur þú annað hvort:

Búið til sérsniðinn tengil til að deila skilríkjunum úr Europass-veski eða EDC Viewer. Deilingartengillinn leiðir til sömu útgáfu skilríkjanna og þú sérð í skoðaranum, en hann fjarlægir möguleikann á að deila þeim frekar.
Búið til PDF-útgáfu af skilríkjunum í EDC Viewer. PDF-skjalið er tveggja blaðsíðna skjal sem inniheldur forskoðunarmynd af skilríkjunum, yfirlit yfir sannprófunarathuganir, sem og tengil og QR-kóða sem leiðir að fullri mynd af skilríkjunum í EDC Viewer.

EDC page with share and export buttons highlighted

Athugaðu að þú munt aðeins geta búið til deilingartengil eða PDF-skjal með því að opna skilríkin úr Europass-veskinu þínu.

Þegar þú býrð til deilingartengla eða PDF-skjöl þarftu alltaf að tilgreina gildislokadagsetningu. Það er til að tryggja að þú hafir ávallt stjórn á þínum eigin gögnum. Með því að tilgreina gildislokadagsetningu tryggir þú að þriðju aðilar geti nálgast og staðfest gildi skilríkja þinna en muni ekki geta geymt gögnin þín lengur en þú leyfir þeim. Þú getur framlengt eða stytt gildistíma beins deilingartengils eða PDF-skjals í gegnum Europass-reikninginn þinn.

Hvernig get ég fengið evrópsk stafræn skilríki vegna náms?

EDC-skilríki, á svipaðan hátt og hefðbundin skilríki, eru gefin út af, eða fyrir hönd, stofnunarinnar sem þú hefur ákveðið að stunda nám hjá. Þessi stofnun gæti verið þjálfunaraðili, háskóli eða önnur stofnun. Til að sjá hvort þú getur fengið prófskírteinið þitt eða annað vottorð sem EDC-skilríki bjóðum við þér að hafa beint samband við viðkomandi stofnun.

Spurningar um EDC-skilríkin mín

Ekki er hægt að breyta innihaldi skilríkjanna. Ef þú fannst einhverjar villur eða ónákvæmni í skilríkjunum þínum þarf að endurútgefa þau. Ef þú hefur spurningar um innihald þinna evrópsku stafrænu skilríkja vegna náms skaltu hafa samband við stofnunina sem gaf þau út.

Vinsamlegast athugaðu að hvorki Europass né stuðningsteymi EDC-skilríkja geta veitt frekari upplýsingar um innihald skilríkjanna og að þau geta ekki breytt neinum upplýsingum sem eru í skilríkjum. Ef þú ert óviss um hvaða stofnun gaf skilríkin þín út geturðu fundið þær upplýsingar undir flipanum „Útgefandi“ þegar þú skoðar skilríkin.

Ef þú átt í erfiðleikum með að nota Europass-veskið þitt eða að sjá skilríkin skaltu hafa samband við þjónustuborð Europass og lýsa vandamálinu sem þú stendur frammi fyrir nákvæmlega.