It-Trattat ta' Liżbona 

Il-Konferenza Intergovernattiva responsabbli mit-tħejjija tat-Trattat Ewropew ta’ Riforma tnediet f’Liżbona fit-23 ta’ Lulju 2007. Il-Parlament Ewropew kien irrappreżentat minn Elmar Brok, Enrique Barón Crespo u Andrew Duff.

It-test tat-Trattat kien approvat waqt laqgħa bejn il-kapijiet tal-istat u l-gvern f’Liżbona bejn it-18 u d-19 ta’ Ottubru 2007. It-Trattat ta’ Liżbona ġie ffirmat fil-preżenza tal-President tal-Parlament Ewropew Hans-Gert Pöttering fit-13 ta’ Diċembru 2007, wara proklama fil-Parlament dwar il-Karta tad-Drittijiet Fundamentali tal-UE mill-Presidenti tal-Parlament Ewropew, tal-Kummissjoni u tal-Kunsill.

Bis-saħħa tat-Trattat ta’ Liżbona , il-Parlament għandu d-dritt li jaħtar il-President tal-Kummissjoni, abbażi ta' proposta mill-Kunsill Ewropew li tqis ir-riżultati tal-elezzjonijiet tal-Parlament Ewropew. Il-proċess ta’ kodeċiżjoni nfirex fuq oqsma ġodda, u sar l-proċedura leġiżlattiva ordinarja.

Bi ftit eċċezzjonijiet, it-Trattat iqiegħed lill-Parlament Ewropew, bħala leġiżlatur, f’livell ekwivalenti għal dak tal-Kunsill f'qosma fejn qabel ma kienx il-każ, partikolarment fil-formulazzjoni tal-baġit tal-UE (il-Parlament igawdi parità totali), il-politika tal-agrikoltura, il-ġustizzja u l-intern.

It-Trattat daħal fis-seħħ fl-1 ta' Diċembru 2009, wara li ġie ratifikat mis-27 Stat Membru kollha.

• Iffirmat: f'Liżbona (il-Portugall) fit-13 ta’ Diċembru 2007
• Dħul fis-seħħ: l-1 ta' Diċembru 2009