Critéir aontachais (critéir Chóbanhávan)

Leagtar amach sa Chonradh ar an Aontas Eorpach na coinníollacha (Airteagal 49) agus na prionsabail (Airteagal 6(1)) nach mór cloí leo más mian le tír ballraíocht a ghlacadh san Aontas Eorpach (AE).

Ní mór critéir áirithe maidir le haontachas a chomhlíonadh. Cuireadh na critéir sin (ar a dtugtar critéir Chóbanhávan) ar bun ag an gComhairle Eorpach i gCóbanhávan in 1993 agus rinneadh iad a neartú ag an gComhairle Eorpach i Maidrid in 1995.

Is iad sin:

• cobhsaíocht na n–institiúidí a ráthaíonn an daonlathas, an smacht reachta, cearta an duine agus meas do mhionlaigh chomh maith le cosaint na mionlach sin;
• geilleagar margaidh atá inmharthana, agus a bheith ábalta aghaidh a thabhairt ar an iomaíocht agus ar fhórsaí margaidh laistigh den Aontas Eorpach;
• an cumas glacadh le hoibleagáidí um ballraíocht, lena n–áirítear an cumas chun rialacha, caighdeáin agus beartais chorpas dlí AE (an “ acquis ”) a chur i bhfeidhm, agus glacadh le haidhmeanna an aontais pholaitiúil, eacnamaíoch agus airgeadaíochta.