Il-ġlieda kontra l-kriminalità organizzata

Il-politika tal-Unjoni Ewropea (UE) tfittex li tiġġieled il-kriminalità organizzata. Filwaqt li attivitajiet operattivi, bħall-prosekuzzjoni tal-kriminali tibqa’ r-responsabilità tal-Istati Membri tal-UE, l-objettiv tal-UE huwa li tassisti fil-ġlieda kontra l-kriminalità organizzata b’mod aktar effettiv.

L-azzjoni tal-UE hija bbażata fuq għodod varji, bħall-ġbir ta’ statistika affidabbli dwar il-kriminalità u l-istabbiliment ta’ netwerks għall-iskambju ta’ informazzjoni u l-aqwa prattiki. L-UE hija megħjuna mill-aġenziji speċjalizzati tagħha, bħall-Aġenzija tal-Unjoni Ewropea għall-Kooperazzjoni fil-Ġustizzja Kriminali, l-Aġenzija tal-Unjoni Ewropea għall-Kooperazzjoni fl-Infurzar tal-Liġi u l-Aġenzija tal-Unjoni Ewropea għat-Taħriġ fl-Infurzar tal-Liġi.

F’April 2021, il-Kummissjoni Ewropea ppreżentat l-istrateġija tal-UE biex tindirizza l-kriminalità organizzata. Din tiffoka fuq:

• l-ixprunar tal-infurzar tal-liġi u l-kooperazzjoni ġudizzjarja;
• it-titjib ta’ investigazzjonijiet effettivi biex ifixklu l-istrutturi tal-kriminalità organizzata u reati ta’ prijorità għolja;
• it-tneħħija tal-profitti kriminali (l-approċċ “segwi l-flus”);
• l-iżgurar ta’ rispons modern għall-iżviluppi teknoloġiċi.

Il-Fond għas-Sigurtà Interna għall-perjodu 2021-2027 jibni fuq il-predeċessur tiegħu u jadattaha għall-iżviluppi ġodda, bħall-ħtieġa biex jintensifika l-ġlieda kontra t-terroriżmu, kriminalità serja u organizzata u l-ċiberkriminalità. Il-programm se jappoġġa miżuri biex:

• itejjeb il-qsim tal-informazzjoni;
• jintensifika kooperazzjoni transfruntiera, inkluż operazzjonijiet konġunti fuq it-terroriżmu u l-kriminalità organizzata;
• isaħħaħ il-kapaċità biex jevita u jiġġieled il-kriminalità.