Kooperazzjoni tal-pulizija u ġudizzjarja f’materji kriminali

Fl-ispazju ta’ libertà, sigurtà u ġustizzja, l-għan tal-kooperazzjoni tal-pulizija u ġudizzjarja f’materji kriminali huwa li tiżgura livell għoli ta’ sikurezza għaċ-ċittadini tal-Unjoni Ewropea (UE) billi tipprevjeni u tiġġieled il-kriminalità, ir-razziżmu u l-ksenofobija. Din hija trattata fit-Titolu V tat-Trattat dwar il-Funzjonament tal-Unjoni Ewropea (il-Kapitoli I, IV u V).

Il-kooperazzjoni tal-pulizija u ġudizzjarja tal-UE f’materji kriminali tieħu tliet forom:

• il-kooperazzjoni bejn il-forzi tal-pulizija nazzjonali;
• il-kooperazzjoni bejn l-amministrazzjonijiet nazzjonali (b’mod partikolari s-servizzi doganali);
• il-kooperazzjoni bejn l-awtoritajiet ġudizzjarji nazzjonali.

Il-kooperazzjoni tiġi implimentata bl-għajnuna ta’ aġenziji tal-UE bħall-Aġenzija tal-Unjoni Ewropea għall-Kooperazzjoni fil-Ġustizzja Kriminali (il-Eurojust), l-Aġenzija tal-Unjoni Ewropea għall-Kooperazzjoni fl-Infurzar tal-Liġi (il-Europol) u n-Network Ġudizzjarju Ewropew.Il-kooperazzjoni bejn il-ġudikatura prinċipalment topera permezz ta’ mekkaniżmu msejjaħ rikonoxximent reċiproku ta’ sentenzi u deċiżjonijiet ġudizzjarji (pereżempju fil-qasam tad-detenzjoni u t-trasferiment ta’ priġunieri, il-Mandat ta’ Arrest Ewropew, l-Ordni ta’ Investigazzjoni Ewropea, il-konfiska u l-iffriżar tal-assi, u penali finanzjarji).

F’Ġunju 2022, il-Kunsill tal-Unjoni Ewropea adotta rakkomandazzjoni dwar il-kooperazzjoni operazzjonali tal-pulizija. Din tistabbilixxi serje ta’ standards għall-kooperazzjoni operazzjonali bejn l-uffiċjali tal-pulizija li joperaw fi Stat Membru ieħor tal-UE jew li jipparteċipaw f’operazzjonijiet konġunti. Dawn jinkludu:

• serje ta’ prinċipji għal insegwimenti u sorveljanza transkonfinali;
• lista ta’ reati li għalihom għandhom ikunu permessi l-insegwimenti u s-sorveljanza transkonfinali;
• qafas għal operazzjonijiet konġunti;
• l-introduzzjoni ta’ pjattaforma ta’ appoġġ għal viġilanzi konġunti u operazzjonijiet konġunti oħra, u l-iżgurar ta’ aċċess effettiv għall-informazzjoni u l-komunikazzjoni permezz ta’ kanali siguri;
• taħriġ konġunt u żvilupp professjonali bil-għan li tiġi stabbilita kultura tal-pulizija Ewropea.