Rialacha airgeadais lena rialaítear buiséad an Aontais (an rialachán airgeadais)

PRÍOMHPHOINTÍ

Leagtar amach leis an rialachán rialacha comhchoiteanna maidir le buiséad an Aontais a bhainistiú, an dóigh a soláthraítear maoiniú an Aontais do thairbhithe agus an dóigh a mbainistíonn institiúidí an Aontais a gcuid airgid féin. Leagtar amach leis freisin rialacha maidir leis an dóigh a soláthraíonn institiúidí an Aontais oibreacha, soláthairtí agus seirbhísí, an dóigh a dtugann siad deontais agus duaiseanna, agus an dóigh a n–úsáideann siad ionstraimí airgeadais nó ráthaíochtaí buiséadacha.

Buiséad an Aontais a dhéanamh níos trédhearcaí

Lena áirithiú go ndéanfar an buiséad a bhainistiú go hoscailte agus go gcothófar muinín an phobail ina leith, dírítear sa rialachán ar roinnt príomhréimsí:

• feabhas a chur ar leibhéal na faisnéise poiblí trí bhunachar sonraí poiblí feabhsaithe a thabhairt isteach chun faisnéis níos mionsonraithe a thabhairt faoin dóigh a mbaintear úsáid as buiséad an Aontais agus faoi cé a fhaigheann maoiniú an Aontais;
• rialuithe, monatóireacht agus iniúchtaí a neartú trína dhéanamh éigeantach sonraí a bhailiú maidir leo siúd a fhaigheann maoiniú, lena n–áirítear iad siúd a bhainfidh an tairbhe is mó as cinntí um maoiniú, chun cuntasacht níos fearr a áirithiú;
• riosca a bhainistiú trí chóras comhtháite TF a úsáid le haghaidh mianadóireacht sonraí agus scóráil riosca maidir le modhanna uile chur chun feidhme bhuiséad an Aontais chun neamhrialtachtaí, calaois, coinbhleachtaí leasa nó saincheisteanna eile a d’fhéadfadh a bheith ann a shainaithint.

Buiséad an Aontais a chosaint

Tugtar isteach leis an rialachán bearta chun an buiséad a chosaint ar bhealach níos éifeachtaí, lena n–áirítear:

• córas luathbhraite agus luatheisiaimh lena neartaítear cumas an Choimisiúin Eorpaigh faighteoirí maoinithe a sháróidh rialacha an Aontais a shainaithint agus iad a eisiamh ó mhaoiniú a fháil arís;
• leathnú a dhéanamh ar raon feidhme an chórais braite chun bainistíocht chomhroinnte ar chur chun feidhme an bhuiséid a chur san áireamh, amhail maoiniú ó Chiste Forbraíochta Réigiúnaí na hEorpa nó ón tSaoráid Téarnaimh agus Athléimneachta;
• na rialacha maidir le coinbhleacht leasa a nuashonrú trí choinbhleacht leasa a athshainmhíniú ionas gur féidir rannpháirtithe a eisiamh ó mhaoiniú má bhraitear coinbhleachtaí dá leithéid;
• rialuithe digiteacha níos fearr a úsáideann teicneolaíochtaí digiteacha chun cáilíocht agus éifeachtúlacht rialuithe agus iniúchtaí a threisiú trí dhigitiú agus trí theicneolaíochtaí atá ag teacht chun cinn, i gcomhréir le tiomantas an Choimisiúin do chleachtais dhigiteacha.

Buiséad an Aontais a dhéanamh níos sofhreagrúla

Chun an buiséad a dhéanamh níos freagrúla i gcásanna géarchéime, tugtar isteach leis an rialachán:

• creat simplithe maidir le soláthar i gcásanna géarchéime, lena mbunaítear treoirlínte dlíthiúla soiléire agus níos solúbtha;
• an deis go bhféadfaí institiúidí an Aontais gníomhú thar ceann Bhallstáit AE nó mar mhórdhíoltóirí, fiú mura bhfuil géarchéim ann;
• uirlis nua cur chun feidhme buiséid lena chur ar chumas an Choimisiúin cur le tionscnaimh dhomhanda, ar cistí tiomsaithe ildeontóirí iad chun aghaidh a thabhairt ar dhúshláin dhomhanda amhail an t–athrú aeráide, oideachas agus galair a chomhrac amhail SEIF (siondróm easpa imdhíonachta faighte), eitinn agus maláire.