Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32008E0491

Azzjoni konġunta tal-Kunsill 2008/491/PESK tas- 26 ta' Ġunju 2008 li temenda u testendi l-Azzjoni Konġunta 2007/406/PESK dwar il-missjoni ta' konsulenza u assistenza ta' l-Unjoni Ewropea għar-riforma tas-settur tas-sigurtà fir-Repubblika Demokratika tal-Kongo (EUSEC RD CONGO)

ĠU L 168, 28.6.2008, pp. 42–43 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

Legal status of the document No longer in force, Date of end of validity: 30/06/2009

ELI: http://data.europa.eu/eli/joint_action/2008/491/oj

28.6.2008   

MT

Il-Ġurnal Uffiċjali ta’ l-Unjoni Ewropea

L 168/42

AZZJONI KONĠUNTA TAL-KUNSILL 2008/491/PESK

tas-26 ta' Ġunju 2008

li temenda u testendi l-Azzjoni Konġunta 2007/406/PESK dwar il-missjoni ta' konsulenza u assistenza ta' l-Unjoni Ewropea għar-riforma tas-settur tas-sigurtà fir-Repubblika Demokratika tal-Kongo (EUSEC RD CONGO)

IL-KUNSILL TA' L-UNJONI EWROPEA,

Wara li kkunsidra t-Trattat ta' l-Unjoni Ewropea, u b'mod partikolari l-Artikolu 14 tiegħu,

Billi:

(1)

L-Unjoni Ewropea sa mit-2 ta' Mejju 2005 wettqet missjoni ta' konsulenza u assistenza għar-riforma tas-settur tas-sigurtà fir-Repubblika Demokratika tal-Kongo (RDK) (EUSEC RD Congo). Il-mandat attwali tal-missjoni huwa speċifikat fl-Azzjoni Konġunta 2007/406/PESK (1) u jiskadi fit-30 ta' Ġunju 2008.

(2)

Il-mandat tal-missjoni għandu jiġi estiż għal perijodu ta' 12-il xahar li jibda mill-1 ta' Lulju 2008.

(3)

L-appoġġ ta' l-Unjoni Ewropea għall-awtoritajiet Kongoliżi fil-qasam tar-riforma tas-settur tas-sigurtà fir-RDK issa għandu jiġi dirett ukoll lejn it-tfassil ta' arranġamenti għall-organizzazzjoni tal-Forza ta' Reazzjoni Rapida futura kif speċifikata mill-gvern tar-RDK bħala parti mill-pjan ta' direzzjoni ġenerali għar-riforma ta' l-armata. Il-funzjoni tar-“riżorsi umani” għandha tiġi enfasizzata b'mod partikolari.

(4)

Id-dikjarazzjonijiet ta' impenn iffirmati f'Goma fit-23 ta' Jannar 2008 bejn il-Gvern tar-RDK u l-gruppi armati li joperaw fil-Kivu, bdew proċess ta' paċifikazzjoni tal-Kivu. Dan il-proċess jibbenefika mill-appoġġ tal-komunità internazzjonali inkluża l-Unjoni Ewropea permezz tar-Rappreżentant Speċjali ta' l-UE (RSUE) għar-reġjun tal-Lagi l-Kbar Afrikani. Il-missjoni EUSEC RD Congo għandha tikkontribwixxi għall-isforzi magħmula mir-RSUE fil-ħidma li qed titwettaq biex jiġu implimentati d-dikjarazzjonijiet ta' impenn għall-Kivu.

(5)

Għandu jiġi previst ammont finanzjarju ta' referenza ġdid sabiex ikopri n-nefqa relatata mal-missjoni għal perijodu ta' bejn l-1 ta' Lulju 2008 u t-30 ta' Ġunju 2009.

(6)

Is-sitwazzjoni attwali f'materja ta' sigurta' fir-RDK tista' tiddeġenera, u b'hekk tipproduċi konsegwenzi potenzjalment serji għall-proċess tat-tisħiħ tad-demokrazija, ta' l-istat tad-dritt, u s-sigurta' f'livell internazzjonali u reġjonali. Impenn kontinwu ta’ l-UE f’dak li hu sforz politiku u riżorsi jgħin sabiex tiġi msaħħa l-istabbiltà fir-reġjun.

(7)

L-Azzjoni Konġunta 2007/406/PESK għandha tiġi emendata kif meħtieġ,

ADOTTA DIN L-AZZJONI KONĠUNTA:

Artikolu 1

L-Azzjoni Konġunta 2007/406/PESK hija b'dan emendata kif ġej:

1)

Fl-Artikolu 2, il-punti (a) sa (e) għandhom jiġu sostitwiti b’dawn li ġejjin:

“a)

li tipprovdi konsulenza u assistenza lill-awtoritajiet Kongoliżi fil-ħidma tagħhom immirata lejn l-integrazzjoni, ir-ristrutturazzjoni u r-rikostruzzjoni ta' l-armata Kongoliża, b'mod partikolari:

—

li tikkontribwixxi għall-iżvilupp ta' pjanijiet u linji politiċi nazzjonali differenti, inkluża l-ħidma fuq kwistjonijiet orizzontali li jkopru l-oqsma kollha involuti fir-riforma tas-settur tas-sigurtà tar-RDK;

—

li tagħti appoġġ lill-kumitati u l-korpi involuti f'din il-ħidma, u tikkontribwixxi għad-definizzjoni tal-prijoritajiet u l-bżonnijiet prattiċi tal-Kongoliżi;

—

li tikkontribwixxi, inkluż billi tipprovdi l-parir espert tagħha dwar l-għażla, it-taħriġ u l-edukazzjoni tal-persunal u l-evalwazzjoni tar-rekwiżiti ta' l-infrastruttura u l-materjal, għat-tfassil ta' arranġamenti għall-organizzazzjoni u l-istabbiliment gradwali tal-Forza ta' Reazzjoni Rapida bħala parti mill-pjan ta' direzzjoni ġenerali għar-riforma ta' l-armata b'rispett lejn il-prinċipji tad-drittijiet tal-bniedem, tal-liġi umanitarja internazzjonali, tal-kwistjoni dwar l-ugwaljanza bejn is-sessi kif ukoll ta' dawk relatati mat-tfal affettwati mill-konflitti armati;

b)

li tmexxi u tlesti b'suċċess il-proġett ta' assistenza teknika fir-rigward ta' l-immodernizzar tal-katina ta' ħlas tal-Ministeru tad-Difiża fir-RDK, minn hawn 'il quddiem imsejjaħ “il-proġett ta' katina ta' ħlas”, sabiex jitwettqu l-kompiti speċifikati fil-Kunċett ġenerali dwar dan il-proġett;

c)

li, abbażi tal-proġett tal-katina ta' ħlas, tipprovdi appoġġ għall-funzjoni tar-riżorsi umani u għall-iżvilupp ta' politika ġenerali dwar ir-riżorsi umani;

d)

li tidentifika u tikkontribwixxi għall-iżvilupp ta' diversi proġetti u għażliet li l-UE jew l-Istati Membri tagħha jistgħu jiddeċiedu li jappoġġaw relatati mar-riforma tas-settur tas-sigurtà;

e)

li tissorvelja u tiżgura l-implimentazzjoni ta' proġetti speċifiċi ffinanzjati jew mibdija mill-Istati Membri bil-għan li jinkisbu l-għanijiet tal-missjoni, f'koordinazzjoni mal-Kummissjoni;

f)

li tipprovdi, kif u meta jkun meħtieġ, appoġġ lir-RSUE fil-qasam tal-ħidma mwettqa mill-kumitati għall-proċess ta' paċifikazzjoni tal-Kivu;

u

g)

li tikkontribwixxi sabiex tiżgura l-konsistenza ta' l-isforzi kollha mwettqa fil-qasam tar-Riforma tas-Settur tas-Sigurtà (SSR).”.

2)

Fl-Artikolu 3(a), it-tieni inċiż għandu jiġi sostitwit b'dan li ġej:

“—

ċellola ta' appoġġ, u”;

3)

Fl-Artikolu 3(c), it-tieni inċiż, il-kliem “grupp mobbli” għandu jiġi sostitwit bil-kliem “gruppi mobbli”;

4)

L-Artikolu 5(1) għandu jiġi emendat kif ġej:

a)

Il-paragrafu 1 huwa sostitwit bit-test li ġej:

“1.   Il-Kap tal-Missjoni għandu jieħu f'idejh il-ġestjoni ta’ kuljum tal-missjoni u għandu jkun responsabbli għall-persunal u għall-kwistjonijiet dixxiplinari.”;

b)

Fil-paragrafu 2, l-ewwel sentenza għandha tiġi sostitwita bit-test li ġej:

“2.   Fil-qafas tal-mandat tal-missjoni hekk kif imniżżel fl-Artikolu 2(e), il-Kap tal-Missjoni għandu jkun awtorizzat jirrikorri għall-kontribuzzjonijiet finanzjarji ta' l-Istati Membri.”;

5)

L-Artikolu 9(1), il-paragrafu 1 għandu jiġi sostitwit bit-test li ġej:

“1.   L-ammont ta’ referenza finanzjarju maħsub biex ikopri n-nefqa relatata mal-missjoni għall-perijodu mill-1 ta' Lulju 2007 sat-30 ta' Ġunju 2008 għandu jkun ta' EUR 9 700 000.

L-ammont ta’ referenza finanzjarju maħsub biex ikopri n-nefqa relatata mal-missjoni għall-perijodu mill-1 ta' Lulju 2008 sat-30 ta' Ġunju 2009 għandu jkun ta' EUR 8 450 000.”.

6)

L-Artikolu 15 għandu jitħassar.

7)

Fl-Artikolu 16, it-tieni paragrafu għandu jiġi sostitwit bit-test li ġej:

“Għandha tapplika sat-30 ta' Ġunju 2009.”.

Artikolu 2

Din l-Azzjoni Konġunta għandha tidħol fis-seħħ fl-1 ta' Lulju 2008.

Artikolu 3

Din l-Azzjoni Konġunta għandha tiġi ppubblikata fil-Ġurnal Uffiċjali ta’ l-Unjoni Ewropea.

Magħmul fi Brussell, 26 ta’ Ġunju 2008.

Għall-Kunsill

Il-President

D. RUPEL

(1)  ĠU L 151, 13.6.2007, p. 52.

Top