(1)

Ir-Regolament (UE) Nru 600/2014 jitlob lill-awtoritajiet kompetenti u lill-Awtorità Ewropea tat-Titoli u s-Swieq (ESMA) iwettqu għadd sinifikanti ta' kalkoli sabiex jikkalibraw l-applikabilità tar-reġim ta' trasparenza ta' qabel u ta' wara n-negozju u l-obbligu ta' negozjar għad-derivattivi kif ukoll biex jiddeterimaw jekk negozju ta' investiment huwiex internalizzatur sistematiku.

(2)

Sabiex iwettqu l-kalkoli meħtieġa, jeħtieġ li kemm l-awtoritajiet kompetenti, kif ukoll l-ESMA jkunu jistgħu jakkwistaw dejta robusta u ta' kwalità għolja għal kull klassi ta' assi li għaliha japplika r-Regolament (UE) Nru 600/2014. Huwa għalhekk meħtieġ li tittejjeb kemm l-aċċessibbiltà u l-kwalità ta' dejta disponibbli lill-awtoritajiet kompetenti u lill-ESMA skont id-Direttiva 2014/65/UE tal-Parlament Ewropew u tal-Kunsill (2) u r-Regolament (UE) Nru 600/2014 sabiex il-klassifikazzjoni tal-istrumenti finanzjarji, inkluż il-limiti għall-finijiet tat-trasparenza ta' qabel u ta' wara n-negozju, u, fejn ikun meħtieġ, il-kalibrar mill-ġdid ta' dawn il-limiti, ikun jista' jiġi kkalkolat fuq bażi aktar informata wara li jkun ġie applikat ir-reġim għal ċertu perjodu ta' żmien.

(3)

Id-dispożizzjonijiet għandhom jiġu stabbiliti filwaqt li jispeċifikaw, f'termini ġenerali, l-elementi komuni fir-rigward tal-kontenut u tal-format ta' dejta li għandha titressaq miċ-ċentri tan-negozjar, tal-arranġamenti ta' pubblikazzjoni approvati (APA) u tal-fornituri ta' tejp ikkonsolidat (CTPs) għall-finijiet ta' trasparenza u ta' kalkoli oħra. Dawk id-dispożizzjonijiet għandhom jinqraw b'rabta mar-Regolamenti Delegati tal-Kummissjoni (UE) 2017/587 (3), (UE) 2017/583 (4), (UE) 2017/567 (5), (UE) 2017/565 (6) u (UE) 2016/2020 (7) li jiddeskrivu l-metodoloġija u d-dejta meħtieġa biex jitwettqu l-kalkoli rilevanti u jiġu speċifikati l-kontenut u l-iskop tad-dejta meħtieġa biex jitwettqu l-kalkoli ta' trasparenza. Għalhekk, il-kontenut, il-format u l-kwalità tad-dejta ppreżentata fir-rigward taċ-ċentri tan-negozjar, tal-APAs u tas-CTPs għandhom ikunu konsistenti mal-metodoloġija preskritta fl-atti ta' implimentazzjoni rilevanti tad-Direttiva 2014/65/UE u r-Regolament (UE) Nru 600/2014 meta jitwettqu tali kalkoli.

(4)

Bl-eċċezzjoni ta' talbiet potenzjali ta' dejta ad hoc u ta' kalkoli li għandhom jitwettqu għall-finijiet tal-mekkaniżmu tal-limitazzjoni tal-volum, iċ-ċentri tan-negozjar, l-APAs u s-CTPs għandhom jippreżentaw rapporti fuq bażi ta' kuljum. Meta jiġi kkunsidrat l-ambitu wiesa' tal-istrumenti finanzjarji koperti u l-ammont kbir ta' dejta li għandha tiġi pproċessata, din il-preżentazzjoni fuq bażi ta' kuljum tiffaċilita lill-awtoritajiet kompetenti jipproċessaw b'mod aktar preċiż fajls ta' daqsijiet maniġġabbli u tiżgura ġestjoni effiċjenti u fil-ħin tal-preżentazzjoni tad-dejta, tal-verifika tal-kwalità tad-dejta u tal-ipproċessar tad-dejta. Il-ġbir ta' dejta fuq bażi ta' kuljum jissemplifika wkoll l-obbligu ta' provvediment ta' dejta fiċ-ċentri tan-negozjar, l-APAs u s-CTPs billi jħaffilhom il-piż tal-kalkolu tan-numru ta' jiem ta' negozjar fil-każijiet fejn il-kriterju ta' likwidità kwantitattiv ikun applikabbli, u li jaggregaw id-dejta għall-istess strument finanzarju fi bramel ta' maturità ta' żmien differenti fil-każijiet fejn għandu jiġi kkunsidrat iż-żmien tal-maturità. Iċ-ċentralizzar tal-kalkolu jiżgura wkoll użu konsistenti tal-kriterji fl-istrumenti finanzjarji u fiċ-ċentri tan-negozjar kollha.

(5)

Iċ-ċentri tan-negozjar għandhom jaħżnu dejta li tkun komprensiva u tippermetti lill-awtoritajiet kompetenti u lill-ESMA jwettqu kalkoli preċiżi. Filwaqt li l-informazzjoni mitluba tkun ipprovduta normalment fir-rapporti ta' wara n-negozjar, f'xi każijiet, l-informazzzjoni meħtieġa għall-kalkoli tmur lil hinn mill-informazzjoni disponibbli f'dawk ir-rapporti. Dan jinkludi, pereżempju, informazzjoni dwar tranżazzjonijiet eżegwiti abbażi ta' ordnijiet li bbenefikaw minn eżenzjoni fuq skala kbira. Din l-informazzjoni ma għandhiex tkun inkluża f'rapporti ta' negozjar peress li tista' tesponi tali tranżazzjonijiet għal impatt negattiv fuq is-suq. Madankollu, peress li l-informazzjoni tista' tkun meħtieġa għall-awtoritajiet kompetenti biex jitwettqu l-kalkoli meħtieġa, hija għandha tinħażen b'mod adegwat miċ-ċentri tan-negozjar, mill-APAs u mis-CTPs u għandha tiġi kkomunikata lill-awtoritajiet kompetenti u lill-ESMA fejn ikun meħtieġ. Iċ-ċentri tan-negozjar għandhom jiżguraw li huma jxerrdu b'mod adegwat l-informazzjoni li għandha tiġi pprovduta lill-awtoritajiet kompetenti u lill-ESMA. It-tranżazzjonijiet eżegwiti abbażi ta' ordnijiet fuq skala kbira għandhom ikunu identifikati b'mod adegwat fir-rapport tagħhom lis-CTPs.

(6)

Id-dejta għandha tinġabar minn varjetà ta' sorsi peress li jista' jkun li sors wieħed mhux dejjem ikollu sett ta' dejta komplut għal klassi ta' assi jew saħansitra għal strument partikolari. Għalhekk, biex jippermettu lill-awtoritajiet kompetenti u lill-ESMA jiksbu u jikkonsolidaw dejta ta' kwalità għolja minn diversi sorsi, iċ-ċentri ta' negozjar, l-APAs u s-CTPs għandhom jużaw, meta jkunu disponibbli, speċifikazzjonijiet stabbiliti minn qabel f'termini ta' kontenut u ta' format sabiex il-ġbir ta' dejta jsir aktar faċli u aktar kosteffiċjenti.

(7)

Meta wieħed jikkunsidra s-sensittività tal-kalkoli meħtieġa u l-konsegwenzi kummerċjali potenzjali għaċ-ċentri tan-negozjar, l-emittenti u l-parteċipanti l-oħra tas-suq tal-pubblikazzjoni ta' informazzjoni inkorretta li tista' twassal, fil-każ tal-mekkaniżmu tal-limitazzjoni tal-volum, għas-sospensjoni tal-użu ta' eżenzjonijiet għal ċentru partikolari wieħed jew fl-Unjoni kollha għal strument finanzjarju partikolari, huwa kruċjali li jiġi kkjarifikat il-format tad-dejta li għandha tiġi ppreżentata lill-awtoritajiet kompetenti u lill-ESMA sabiex jiġu stabbiliti mezzi ta' komunikazzjoni effiċjenti maċ-ċentri tan-negozjar u s-CTPs u tiġi żgurata pubblikazzjoni fil-ħin u korretta tad-dejta rikjesta.

(8)

Ir-Regolament (UE) Nru 600/2014 jirrikjedi lill-ESMA tippubblika, għal strumenti finanzjarji li għalihom japplika l-mekkaniżmu tal-limitazzjoni tal-volum, kejl tal-volum totali ta' negozjar fit-12-il xahar preċedenti u tal-persentaġġi ta' negozjar skont l-eżenzjonijiet tat-tranżazzjonijiet negozjati, kif ukoll tal-prezz referenzjarju fit-12-il xahar preċedenti. Fil-każ ta' strumenti finanzjarji nnegozjati f'aktar minn munita waħda, jeħtieġ li l-volumi eżegwiti f'muniti differenti jiġu kkonvertiti f'munita komuni waħda sabiex tkun permessal-komputazzjoni ta' dawk il-volumi u jsiru l-kalkoli meħtieġa. Għalhekk, il-metodoloġija u r-rati tal-kambju li għandhom jintużaw biex jikkonvertu, fejn ikun meħtieġ, il-volumi ta' kummerċ għandhom jiġu previsti.

(9)

Għall-finijiet tal-mekkaniżmu tal-limitazzjoni tal-volum, iċ-ċentri tan-negozjar għandhom jintalbu jirrapportaw il-volumi ta' negozjar eżegwiti skont l-eżenzjoni tal-prezz referenzjarju u, għal strumenti likwidi, l-eżenzjoni tat-tranżazzjonijiet negozjati. Peress li l-eżenzjonijiet japplikaw għal ordnijiet u mhux għal tranżazzjonijiet, huwa importanti li jiġi ċċarat li l-volumi li għandhom jiġu rrapportati għandhom jinkludu t-tranżazzjonijiet kollha mmarkati b'“RFPT” jew “NLIQ” għall-fini tal-pubblikazzjoni ta' wara n-negozju tat-tranżazzjonijiet u kif speċifikat fir-Regolament Delegat (UE) 2017/587. Meta tranżazzjoni tkun ġiet eżegwita fuq il-bażi ta' żewġ ordnijiet li jibbenefikaw mill-eżenzjoni fuq skala kbira, din it-tranżazzjoni ma għandhiex tgħodd għall-volumi kkalkulati skont l-eżenzjoni tal-prezz referenzjarju u l-eżenzjoni tat-tranżazzjonijiet negozjati.

(10)

Għall-fini tal-mekkaniżmu tal-limitazzjoni tal-volum, il-ċentri tan-negozjar s-u CTPs għandhom jiżguraw li ċ-ċentru tan-negozjar li fuqu ġiet eżegwita t-tranżazzjoni jkun identifikat bi granularità suffiċjenti sabiex jippermetti lill-ESMA twettaq il-kalkoli kollha msemmija fir-Regolament (UE) Nru 600/2014. B'mod partikolari, l-identifikatur taċ-ċentru tan-negozjar li jintuża għandu jkun uniku għal dak iċ-ċentru ta' negozjar u mhux maqsum ma' xi ċentru tan-negozjar ieħor operat mill-istess operatur tas-suq. L-identifikaturi taċ-ċentru tan-negozjar għandhom jippermettu lill-ESMA tiddistingwi b'mod mhux ekwivoku ċ-ċentri kollha ta' negozjar li għalihom l-operatur tas-suq irċieva awtorizzazzjoni speċifika skont id-Direttiva 2014/65/UE.

(11)

Għall-fini tal-mekkaniżmu tal-limitazzjoni tal-volum, jeħtieġ li ċ-ċentri ta' negozjar jiġu rikjesti jippreżentaw l-ewwel rapport fil-jum tad-dħul fl-applikazzjoni tad-Direttiva 2014/65/UE u tar-Regolament (UE) Nru 600/2014 mal-volumi ta' kummerċ skont l-eżenzjoni tal-prezz referenzjarju u, għal strumenti finanzjarji likwidi, l-eżenzjoni tat-tranżazzjonijiet negozjati għas-sena kalendarja preċedenti. Biex tiġi żgurata applikazzjoni proporzjonali ta' dan ir-rekwiżit, iċ-ċentri tan-negozjar għandhom, għal dak il-għan, jibbażaw ir-rapport tagħhom dwar il-volumi aġġustati ta' negozjar eżegwiti skont l-eżenzjonijiet ekwivalenti li jeżistu skont id-Direttiva 2004/39/KE tal-Parlament Ewropew u tal-Kunsill (8) u r-Regolament tal-Kummissjoni (KE) Nru 1287/2006 (9).

(12)

Sabiex jipprovdu lill-awtoritajiet kompetenti u lill-ESMA bid-dejta preċiża, iċ-ċentri tan-negozjar, l-APAs u s-CTPs għandhom jiżguraw li r-rapporti tagħhom jinkludu biss tranżazzjonijiet “single-counted”.

(13)

Id-dispożizzjonijiet f'dan ir-Regolament huma marbuta mill-qrib, peress li huma jindirizzaw l-ispeċifikazzjoni tal-kontentut, il-frekwenza, il-format ta' talbiet ta' dejta, il-metodu li għandu jintuża biex jipproċessa din id-dejta u speċifikazzjonijiet oħra relatati mal-pubblikazzjoni ta' informazzjoni għall-finijiet tat-trasparenza kif iddefinita skont ir-Regolament (UE) Nru 600/2014. Sabiex tiġi żgurata koerenza bejn dawn id-dispożizzjonijiet, li se jidħlu fis-seħħ fl-istess ħin, u biex tiġi permessa opinjoni komprensiva għall-partijiet kkonċernati, u b'mod partikolari dawk soġġetti għall-obbligi, huwa mixtieq li dawn jiġu inklużi fir-Regolament uniku.

(14)

Għal raġunijiet ta' konsistenza u sabiex ikun żgurat il-funzjonament bla xkiel tas-swieq finanzjarji, huwa meħtieġ li d-dispożizzjonijiet stabbiliti f'dan ir-Regolament u d-dispożizzjonijiet stabbiliti fir-Regolament (UE) Nru 600/2014 japplikaw mill-istess data.

(15)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-ESMA lill-Kummissjoni.

(16)

L-ESMA għamlet konsultazzjonijiet pubbliċi miftuħa dwar l-abbozz ta' standards tekniċi regolatorji li fuqu huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Ikkonċernati tat-Titoli u s-Swieq stabbilit bl-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (10),