12.12.2006   

MT

Il-Ġurnal Uffiċjali ta’ l-Unjoni Ewropea

137

(1)

Id-Deċiżjoni tal-Kummissjoni 2005/131/KE dwar l-assistenza finanzjarja mill-Komunità għall-operat ta' ċerti laboratorji ta' referenza Komunitarji fil-qasam tas-saħħa pubblika veterinarja (riskji bijoloġiċi) għas-sena 2005 (2), tagħtihom għajnuna finanzjarja Komunitarja sabiex iwettqu ċerti funzjonijiet u doveri.

(2)

Nhar it-28 ta’ Jannar 2005, bord ta' esperti ta' l-UE, ippresedut mil-Laboratorju ta' Referenza Komunitarju (LRK) għall-enċefalopatiji sponġiformi trażmissibbli (EST), ikkonferma s-sejbien ta’ enċefalopatija sponġiformi bovina (BSE - bovine spongiform encephalopathy) f’mogħża maqtula fi Franza. Dan kien l-ewwel każ taħt kundizzjonijiet naturali ta’ BSE f’annimal li jixtarr żgħir.

(3)

Fl-istqarrija tiegħu tat-28 ta’ Jannar 2005, il-Panel Xjentifiku dwar il-Perikli Bijoloġiċi ta’ l-Awtorità Ewropea għas-Sigurtà Alimentari (EFSA - European Food Safety Authority) sostna li s-sinifikat ta’ dan il-każ waħdieni ta’ infezzjoni tal-BSE f'mogħża fi Franza għad irid jiġi evalwat. Sabiex isir dan, l-EFSA indikat li r-riżultati ta’ monitoraġġ miżjud ta' l-EST fil-mogħoż ser ikunu essenzjali. Bi tweġiba għal dan, ir-Regolament tal-Kummissjoni (KE) Nru 214/2005 (3) introduċa programm ġdid għall-monitoraġġ ta' l-EST fl-annimali kaprini b'bidu mill-11 ta' Frar 2005. Taħt dan il-programm ġdid ta’ monitoraġġ, in-numri ta’ annimali kaprini maqtula fi stat tajjeb ta' saħħa u dawk mejta fl-irziezet li se jiġu ttestjati żdiedu sostanzjalment.

(4)

Ir-Regolament tal-Kummissjoni (KE) Nru 36/2005 li jemenda l-Annessi III u X għar-Regolament tal-Parlament Ewropew u tal-Kunsill (KE) Nru 999/2001 f’dak li għandu x’jaqsam mas-sorveljanza epidemjoloġika għall-enċefalopatiji sponġiformi trażmissibbli f'annimali bovini, ovini u kaprini (4), daħħal strateġija sabiex tiġi investigata l-preżenza possibbli ta’ enċefalopatija sponġiformi bovina (BSE) f’annimali li jixtarru żgħar. L-istrateġija tinkludi l-ewwelnett l-implimentazzjoni ta’ eżami preliminari tal-każi kollha kkonfermati ta’ EST f’annimali li jixtarru żgħar fl-livell ta’ laboratorji ta’ referenza nazzjonali. It-tieni nett, ring trial b’ta’ l-anqas tliet metodi differenti f’laboratorji magħżula taħt it-tmexxija tal-Laboratorju ta' Referenza tal-Komunità għall-EST (LRK) li għandu jitwettaq fuq il-każi kollha li fihom l-eżami preliminari ma setax jeskludi l-BSE. Fl-aħħarnett, jeħtieġ il-mouse strain typing jekk l-eżitu tat-typing molekolari jeħtieġ li jiġi kkonfermat. Il-kontribut Komunitarju ser ikopri l-ispejjeż kollha tar-ring trial u l-mouse strain typing.

(5)

Fuq talba tal-Kummissjoni, dan ir-rwol ta’ koordinatur min-naħa ta' l-LRK għar-ring trial u l-mouse strain imwettqa f’diversi laboratorji ġie inkluż fil-programmi ta’ ħidma għall-2005.

(6)

Għalhekk, l-assistenza finanzjarja Komunitarja għall-pjan ta’ ħidma annwali ta' l-LRK għandha tiżdied sabiex tkopri l-ispejjeż addizzjonali tar-ring trial u l-mouse strain typing.

(7)

Id-Deċiżjoni 2005/131/KE għandha għalhekk tiġi emendata kif jixraq.

(8)

Il-miżuri stipulati f’din id-Deċiżjoni jikkonformaw ma’ l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali.