Il-missjoni tal-uffiċċji ta’ kollegament

L-EPLOs huma responsabbli għall-implimentazzjoni lokali tal-attivitajiet ta’ komunikazzjoni istituzzjonali, bl-għan aħħari li jagħmlu lin-nies aktar konxji mill-impatt tal-Parlament Ewropew fuq ħajjithom ta’ kuljum u li jippromwovu l-involviment tagħhom fil-proċess demokratiku Ewropew.

L-uffiċċji jaħdmu maċ-ċittadini u mal-partijiet ikkonċernati, jieħdu ħsieb il-kuntatti mal-midja nazzjonali, reġjonali u lokali, u jipprovdu appoġġ lill-Membri tal-Parlament Ewropew (MPE) fl-eżerċizzju tal-mandati uffiċjali tagħhom fl-Istati Membri.

Ħidma maċ-ċittadini

L-EPLOs jaħdmu mal-popolazzjoni lokali u jagħmluha aktar konxja minn x’inhu l-Parlament Ewropew, x’jagħmel u x’jirrappreżenta, kif ukoll milll-impatt li d-deliberazzjonijiet tiegħu għandhom fuq il-ħajja ta’ kuljum taċ-ċittadini.

Dan jagħmluh billi:

• jibnu, irawmu u janimaw network ta’ ċittadini interessati;
• jagħmlu kampanji ta’ komunikazzjoni, jorganizzaw avvenimenti u jtellgħu wirjiet;
• jippromwovu dibattitu dwar suġġetti ta’ attwalità indirizzati fil-livell tal-UE, fil-kuntest tal-inkoraġġiment tal-parteċipazzjoni fid-demokrazija parlamentari Ewropea;
• jikkomunikaw dwar ir-rwol tal-Parlament Ewropew u jirrispondu għat-talbiet għal informazzjoni.

Ħidma mal-partijiet ikkonċernati u mal-multiplikaturi

Il-partijiet ikkonċernati jinkludu awtoritajiet nazzjonali, reġjonali u lokali, gruppi tas-soċjetà ċivili, networks, assoċjazzjonijiet, għalliema, skejjel, universitajiet, gruppi ta’ riflessjoni, organizzazzjonijiet settorjali, korpi tal-UE, eċċ. L-EPLOs jiżviluppaw u jrawmu relazzjonijiet ma’ partijiet ikkonċernati strateġiċi.

Dan jagħmluh billi:

• jippromwovu dibattiti dwar il-leġiżlazzjoni Ewropea u dwar il-ħidma leġiżlattiva tal-Membri;
• jiżguraw li l-partijiet ikkonċernati jirċievu informazzjoni mmirata apposta lejhom dwar oqsma li jolqtuhom speċifikament;
• jaħdmu mal-għalliema u mal-organizzazzjonijiet akkademiċi u jipprovdulhom riżorsi edukattivi;
• jinvolvuhom u joffrulhom l-appoġġ tagħhom f’attivitajiet relatati mal-promozzjoni tal-valuri tal-UE u d-demokrazija;
• jaħdmu mal-awtoritajiet nazzjonali, reġjonali u lokali fl-Istati Membri.

Ħidma mal-midja

B’mod proattiv, l-EPLOs iwasslu l-aħbarijiet, id-dibattiti u d-deċiżjonijiet tal-UE lill-midja nazzjonali, reġjonali, lokali u speċjalizzata.

Dan jagħmluh billi:

• jassistu lill-ġurnalisti fil-ħidma tagħhom u jagħmluhom konxji mill-impatt tal-kwistjonijiet Ewropej;
• jorganizzaw seminars għall-ġurnalisti u jistednuhom ikopru l-attivitajiet tal-Parlament Ewropew;
• joħolqu opportunitajiet medjatiċi għall-MPE fil-midja nazzjonali, reġjonali, lokali u speċjalizzata;
• jieħdu nota tal-ineżattezzi u tal-aħbarijiet qarrieqa dwar il-Parlament Ewropew, u jirribattuhom.

Kompiti oħrajn

• jipprovdu appoġġ għaż-żjarat minn MPE li jkollhom rwol istituzzjonali u lid-delegazzjonijiet parlamentari u lill-missjonijiet uffiċjali;
• jikkooperaw mar-rappreżentanzi tal-Kummissjoni u maċ-ċentri ta’ informazzjoni Europe Direct.