Idirghrúpaí i bParlaimint na hEorpa
Is fóram iad na hidirghrúpaí le haghaigh malartú neamhfhoirmiúil tuairimí maidir le saincheisteanna sonracha, ar malartú é a mbeidh grúpaí éagsúla polaitiúla páirteach ann, agus chun teagmháil idir Feisirí agus an tsochaí shibhialta a dhéanamh. Tá na Feisirí i ngach idirghrúpa ó thrí ghrúpa pholaitiúla éagsúla ar a laghad.
Ní comhlachtaí oifigiúla na Parlaiminte iad idirghrúpaí, ach aithníonn an Pharlaimint iad. Bunaíodh iad le comhaontú idir cathaoirligh na ngrúpaí polaitiúla ag tús gach téarma reachtaigh.
Liosta na n-idirghrúpaí
Is é seo liosta na n-idirghrúpaí sa téarma reachtach reatha. Níor cheart idirghrúpaí a mheascadh le grúpálacha neamhoifigiúla ná le grúpaí cairdis, nach dtugadh aon aitheantas oifigiúil dóibh agus dá bhrí sin níor taispeánadh iad sa liosta seo.
- An tIdirghrúpa um Fhrith-éilliú [IG10-01]
- An tIdirghrúpa um Fhrithchiníochas agus um Éagsúlacht [IG10-02]
- An tIdirghrúpa um Infheistíocht a Mhealladh chun Aontas Eorpach Iomaíoch Inbhuanaithe a áirithiú [IG10-03]
- An tIdirghrúpa um Bithéagsúlacht, um Fhiach agus um an Tuath [IG10-04]
- An tIdirghrúpa um Ailse agus Galair Neamhchoitianta [IG10-05]
- An tIdirghrúpa um Chearta Leanaí [IG10-06]
- An tIdirghrúpa um Chríostaithe sa Mheánoirthear [IG10-07]
- An tIdirghrúpa um an mBeartas Comhtháthaithe agus na Réigiúin is Forimeallaí [IG10-08]
- An tIdirghrúpa um Dhéimeagrafaíocht [IG10-09]
- An tIdirghrúpa um Míchumas [IG10-10]
- An tIdirghrúpa um Oidhreacht Chultúrtha na hEorpa, um Bealach Naomh Shéamais agus um Bealaí Cultúrtha Eorpacha Eile [IG10-11]
- An tIdirghrúpa um an gComhrac in aghaidh na Bochtaineachta [IG10-12]
- An tIdirghrúpa um Shaoirse Reiligiúin, Creidimh agus Coinsiasa [IG10-13]
- An tIdirghrúpa um Thodhchaí an Oideachais agus na Scileanna ar mhaithe le hEoraip Iomaíoch [IG10-14]
- An tIdirghrúpa um Beostoc Inbhuanaithe [IG10-15]
- An tIdirghrúpa um LADTIA+ [IG10-16]
- An tIdirghrúpa um Meabhairshláinte [IG10-17]
- Idirghrúpa maidir leis na Póilíní [IG10-18]
- An tIdirghrúpa um Athléimneacht, Bainistiú Tubaistí agus Cosaint Shibhialta [IG10-19]
- An tIdirghrúpa um Fharraigí, um Aibhneacha, um Oileáin agus um Limistéir Chósta (SEARICA) [IG10-20]
- An tIdirghrúpa um an Spéir agus um an Spás [IG10-21]
- An tIdirghrúpa um Micreafhiontair agus um Fhiontair Bheaga agus Mheánmhéide (FBManna) [IG10-22]
- An tIdirghrúpa um an nGeilleagar Sóisialta agus um Sheirbhísí Leasa Ghinearálta [IG10-23]
- An tIdirghrúpa um Cheardchumainn [IG10-24]
- An tIdirghrúpa um Mionlaigh Thraidisiúnta, um Pobail Náisiúnta agus um Theangacha [IG10-25]
- An tIdirghrúpa um an réiteach dhá stát i gcás Iosrael agus na Palaistíne [IG10-26]
- An tIdirghrúpa um Leas agus Caomhnú Ainmhithe [IG10-27]
- An tIdirghrúpa um Fhíon, um Earraí Bia Ardchaighdeáin agus um Biotáillí [IG10-28]
Idirghrúpaí a rialáil
Déantar na hidirghrúpaí a rialáil le Riail 35 de Rialacha Nós Imeachta agus rialacha inmheánacha eile.
Ar mhaithe le trédhearcacht, ní fhéadfaidh ach ionadaithe leasmhara atá cláraithe sa Chlár Trédhearcachta a bheith rannpháirteach i ngníomhaíochtaí idirghrúpa arna n-eagrú ag an bParlaimint (freastal ar chruinnithe nó ar imeachtaí, tacaíocht a thabhairt dóibh nó iad a chomh-óstáil). Thairis sin, ní mór do gach idirghrúpa dearbhú bliantúil a fhoilsiú lena gcumhdaítear an tacaíocht uile a fhaightear in airgead tirim nó i gcomhchineál (tacaíocht airgeadais, tacaíocht foirne agus tacaíocht ábhartha).
Ina theannta sin, tá cosc ar idirghrúpaí:
- ainmneacha nó lógónna na Parlaiminte nó na ngrúpaí polaitiúla a úsáid;
- tuairim a chur in iúl thar ceann na Parlaiminte;
- gníomhaíochtaí a dhéanamh a d''fhéadfadh a bheith ina gcúis le mearbhall i dtaca le gníomhaíochtaí oifigiúla na Parlaiminte nó a cuid comhlachtaí;
- gníomhaíochtaí a dhéanamh a d’fhéadfadh tionchar diúltach a bheith ann ar chaidreamh le hinstitiúidí AE nó tríú tíortha; agus
- imeachtaí á reáchtáil i dtríú tíortha a tharlaíonn i gcomhthráth le misean de chomhlacht oifigiúil na Parlaiminte, lena n-áirítear breathnóireacht toghchán.
Tá na Caestóirí freagrach as maoirseacht ar idirghrúpaí.
Grúpálacha neamhoifigiúla
Tá na grúpálacha neamhoifigiúla cosúil leis na hidirghrúpaí ó thaobh raon feidhme agus cuspóra de, ach tugann siad aghaidh ar ábhair nach bhfuil cumhdaithe ag na hidirghrúpaí aitheanta. Níl aon bhonn dlí acu, agus ní aithníonn an Pharlaimint iad. Ní bhailíonn an Pharlaimint faisnéis maidir le grúpálacha neamhoifigiúla agus a mballraíocht.
Ní mór d’Fheisirí a fhaigheann tacaíocht sheachtrach i gcomhthéacs na grúpála neamhoifigiúla an tacaíocht sin a áireamh ina ndearbhú maidir le leasanna príobháideacha. Tá an fhaisnéis sin láraithe sa chlár poiblí thíos.
Rialaítear grúpálacha neamhoifigiúla le Riail 36 de na Rialacha Nós Imeachta. Tá siad faoi réir na srianta céanna ar a gcuid gníomhaíochtaí agus atá idirghrúpaí. Ina theannta sin, ní fhéadfaidh grúpálacha neamhoifigiúla a bhaineann le tríú tíortha atá cumhdaithe ag toscaireacht de chuid na Parlaiminte úsáid a bhaint as saoráidí na Parlaiminte (seomraí cruinnithe, ateangaireacht, etc.).
Clár na ngrúpálacha neamhoifigiúla lena ndearbhaítear tacaíocht a fuarthas