Conas a chuirfidh córas dul isteach/imeachta an Aontais feabhas ar shlándáil teorann?
Chun an tslándáil a neartú, tá córas clárúcháin iontrála agus imeachta á chur i bhfeidhm ag an Aontas ag teorainneacha seachtracha chrios Schengen.
Le córas dul isteach/imeachta an Aontais, cuirtear córas clárúcháin lándigiteach ina n-úsáidtear sonraí bithmhéadracha in ionad stampáil láimhe pasanna. Thosaigh tíortha an Aontais ag cur an chórais i bhfeidhm ón 12 Deireadh Fómhair 2025.
Ba cheart dó a bheith oibríochtúil ag gach pointe trasnaithe teorann seachtraí faoin 10 Aibreán 2026.
Cad iad na buntáistí a bhaineann leis an gcóras dul isteach/imeachta?
Ceapadh an córas chun slándáil teorann a fheabhsú agus seiceálacha teorann a dhéanamh níos tapúla agus níos éifeachtúla. Fágfaidh sé go mbeidh sé níos éasca sonraí a chros-seiceáil idir tíortha agus calaois a shainaithint amhail céannachtaí bréige a úsáid.
Cuideoidh sé freisin le daoine a sháraíonn a gcuid ama ceadaithe a bhrath. Ceadaítear do thaistealaithe fanacht i limistéar Schengen ar feadh suas le trí mhí laistigh d’aon tréimhse sé mhí.
Conas a oibríonn an córas dul isteach/imeachta?
Cláraíonn an córas teacht isteach, imeacht agus diúltú cead isteach do gach taistealaí ó lasmuigh den Aontas agus iad ag taisteal chuig an Aontas agus uaidh. Tá feidhm aige seo is cuma an bhfuil víosa de dhíth ar thaistealaithe nó nach bhfuil.
Trí chóras leictreonach a chur in ionad stampaí pas, beidh an próiseas níos tapúla agus níos sláine. Stórálann an córas sin sonraí faoi thaistealaithe, rud a fhágann gur féidir trasnuithe teorann níos tapúla a dhéanamh.
Cé na tíortha ina mbeidh córas dul isteach/imeachta an Aontais ag feidhmiú?
Beidh an córas ag feidhmiú i limistéar Schengen, ina bhfuil 29 dtír Eorpacha: 25 as 27 dtír an Aontais chomh maith leis an Íoslainn, Lichtinstéin, an Iorua agus an Eilvéis. Sa Chipir agus in Éirinn, stampálfar pasanna de láimh fós.
Cad iad na sonraí a bhailíonn an córas dul isteach/imeachta?
- Dátaí agus amanna dul isteach agus imeachta
- Áiteanna iontrála agus imeachta
- Ainm agus uimhir phas an taistealaí
- Sonraí bithmhéadracha (íomhá den aghaidh agus méarloirg)
- Aon chinneadh cead isteach a dhiúltú
