Hii inafuatia kampeni ya mwaka uliopita ambayo iliwafikia mamia ya maelfu ya watoto chini ya umri wa miaka 10. Virusi vya polio viligunduliwa hivi karibuni kwenye sampuli za maji taka huko Gaza, ikionyesha kuwa vinaendelea kusambaa na hivyo kuweka maisha ya watoto wadogo hatarini.

 

Kampeni hii inaongozwa na Wizara ya Afya ya Palestina na inatekelezwa kwa msaada kutoka kwa Shirika la Umoja wa Mataifa la Afya Duniani (WHO), Shirika la Umoja wa Mataifa la Kuhudumia Watoto (UNICEF), Shirika la Umoja wa Mataifa la Wakimbizi wa Kipalestina (UNRWA) na wadau wengine.

 

Kamishna Mkuu wa UNRWA, Philippe Lazzarini, ameandika katika chapisho kwenye jukwaa mtandao wa kijamii wa X kwamba wafanyakazi 1,700 wanashiriki katika vituo vya afya vya shirika hilo na maeneo ya tiba yanayohamishika.

Kwa upande mwingine, Mkurugenzi Mkuu wa WHO, Tedros Adhanom Ghebreyesus, amesema kuwa "timu ziko katika maeneo husika zikitoa msaada kuhakikisha kampeni yenye ubora."

 

Timu za afya za UNRWA zinachangia theluthi moja ya mwitikio, zikiwa na wafanyakazi 555 kati ya jumla ya timu 1,660 zinazoshiriki.

 

Wataendelea kutoa chanjo katika vituo vyake vya afya 10: kimoja huko Rafah, vitatu kila kimoja katika Khan Younis na Eneo la Kati, na kimoja huko Gaza City kaskazini. Karibu vituo 60 vya matibabu ya simu vya UNRWA pia vitatoa chanjo.

 

Kampeni hii ya chanjo dhidi ya Polio katika Gaza inatarajiwa kuendelea hadi tarehe 26 Februari.